Tulis Insulto sa Kapolisan sa Mabolo

Si Mayor Michael Rama mihagit sa mga sakop sa Mabolo Police Station nga dalion pagsulbad ang pagpanulis sa Palawan Express Forwarder nga duol kaayo sa ilang opisina kaganinang buntag.

Matud ni Rama nga usa ka insulto ang gihimo sa mga tulisan kay ang Palawan Express Forwarder anaa ra mahimutang duol sa Mabolo Police Station apan bisan pa niini wala sila makaresponde dayon.

Si Rama miingon nga adunay posibilidad nga ang mga tulisan dili taga dakbayan sa Sugbo og nga wala sila masayud nga ang balay-patigayon nga ilang gitulis nahimutang duol ra sa police station.

Miingon ang mayor nga mahimo usab nga ang maong pagpanulis gitumong aron nga pakauwawan ang mga polis sa Mabolo nga wala makaresponde dayon
sa hitabo.

Kini maoy gibasihan ni Rama nga gihagit niya ang kinatibuk-ang kapolisan nga paspasan ang pagpangita sa mga tulisan.

Kapin sa P150,000 nga kwarta ang giingong nadala sa mga tulisan ingon man usa ka laptop ug ubang mahalong butang.

Ang mga tulisan miuban pagsulod sa duha ka babaye’ng kawani nga nangabli sa balay-patigayon.