Seniors Libre sa Parking

Libre na ang pag-parking sa mga sakyanan diha sa lainlaing Pay Parking areas sulod sa una’ng tulo ka oras kun ang sakyanan adunay sakay nga senior citizens.

Gipatas-an usab sa Cebu City Council ang multa ngadto na sa P5 mil niadtong mga tawo nga dili motuman sa ordinansa sa dakbayan nga naghatag og benepisyo sa mga senior citizens ug Persons with Disabilities.

Si Konsehal Alvin Dizon nga maoy nagsugyot niini nga ordinansa mipasabot nga daghan kaayo nga senior citizens nga imbis magamit ang ilang kwarta pagpalit og mga tambal, maibanan kini sa pagbayad sa parking fee.

Adunay uban’g hospital parking area nga nangolekta og tag P15 ang mata’g oras sa pag-parking sa sakyanan samtang susama usab niini nga kantidad ang gikolekta diha sa mga parking area sa lainlaing department stores.

Matud ni Dizon nga bisan ang mga government parking area sama sa gidumala sa City Traffic Operations Management (CITOM), ug sa Kapitolyo, apil nga obligado nga motuman sa ordinansa.

Ang dili motuman sa ordinansa multahan apan kinahanglan nga ang agrabyado mopadangat og pormal nga reklamo adto sa Office of Senior Citizens Affairs (OSCA) sa Cebu City Hall.

Apan gitataw usab ni Dizon nga apil sa masilotan mao ang mga parking attendants nga mobaliwala lang sa ordinansa. Kadto hinuon nga mga tawo nga magpatuo usab nga senior citizens bisan dili pa sila senior, apilon nga multahan og P5 mil.