‘Piyesta sa Pagpangalagad’ Ipahigayon sa Barangay Kamputhaw

Lain na usab nga Biyernes lain na usab nga Barangay ang matabangan sa mga libreng serbisyo sa kagamhanan sa dakbayan sa Sugbo.

Kini pinaagi sa ‘Piyesta sa Pagpangalagad’ kon ‘City Hall at Your Doorstep’ nga programa ni Cebu City Mayor Michael Rama nga ipahigayon karong Oktubre 30, 2015 adlawng Biyernes ngadto sa Barangay Kamputhaw.

Ang kalihokan nga ipahigayon ngadto sa Sports Complex sa naasoy nga barangay magsugod sa alas-8 sa buntag pinaagi sa usa ka Santos nga Misa. Molungtad ang kalihokan hangtod na nga maserbisyohan tanan nga mosalmot niini.

Tinguha ni Mayor Rama nga moabot sa mga katawhan sa 80 ka barangays ning harang dakbayan ang mga batakang pagpangalagad sa 22 ka departamento sa Cebu City Hall.

Kini naglangkob sa pag-ibot og ngipon; Medikal nga konsultasyon; paghatag og libreng medisina; pagpangtuli; pagtanyag og rehistro sa birth, marriage, og death certificates; pag-isyu og cedula; pag-ayo ug pagpangtaod sa mga suga ug gripo; paghatag og seedlings nga itanumay; pagrehistro og kapon sa mga iro, iring og mga kahayopan; screening sa job fair og referral; pagpanupi sa buhok; paghinlo sa mga drainage og kanal; og paghatag og mga impormasyon kabahin sa fire safety, traffic, kalihokan sa dakbayan, drug awareness, urban poor, legal nga tambag, libreng feeding og uban pa.

Giawhag ang tanang lumulopyo sa Barangay Kamputhaw sa pagpahimulos sa maong talagsaong higayon aron dili na sila mahasol, makagasto ug mahago pa sa pagbisita sa mga nagkadaiyang buhatan Cebu City Hall.

Dugang pa, ang maong kalihokan gipahigayon na matag adlawng Biyernes diin sa milabayng Biyernes Oktubre 23 ang mga lumulopyo sa Barangay Cogon Ramos maoy natabangan niini. (Cebu City Public Information Office PIO/Greggy Jiggs P. Senados)