Pangulipas

palusot, mangugat, way pupamilok,
kamatuoran nga tinuyuang giluok,

mangyamiid siya kuno way labot,
buhat kini’ng mamunga’g panghimaraot,

bisa’g unsaon dili gayud muangkon,
bisan pa’g masakpang mag-ugom,

bisan pa’g kabahandianon’g naangkon,
dili matulon, ug klaro’ng dili makiangayon

layo kaayo sa gipaabot nga dawatonon,
kon tutukan, hungitan ug tubagonon,

puwerteng hugota makabalibad,
walay mahinumdomang maladlad,

mangulipas, kamatuoran ipatipas,
apan ang baga’ng katawhan’g naghingutas,

ang tag-iya sa kuwartang gilampornas
dili tugotang magpadayon ang trampas,

sa nangulipas, maningil, manulisok,
siya pailhong iyang pangulipas gabok!

Blogsite