Halloween Trick or Treat Ipahigayon

Subay sa pagsaulog sa Kalag-Kalag karong tuiga, ipahigayon na usab sa kagamhanan ning dakbayan ang ‘Halloween Trick or Treat’ sa Cebu City Hall karong Oktubre 30 adlawng Biyernes.

Ang mga bata nga anak o apo sa mga empleyado sa Cebu City Government nga nag-edad ug 3 ngadto sa 12 anyos ang mosalmot sa kalihokan nga ipahigayon sulod sa Cebu City Hall.

Tumong sa kalihokan nga mahatagan ug kahigayonan nga makasinati ang mga bata sa ‘Halloween Trick or Treat’ nga kasagaran lamang ipahigayon sa mga shopping malls.

Ang kalihokan nga gipangulohan sa Department of Social Welfare and Services kon DSWS magsugod sa ala-una sa hapon.

Giawhag ang mga empleyado sa nagkadaiyang buhatan sa city hall sa pag-andam ug gasa sama sa candies, lollipops, chocolates ug uban pa aron ihatag sa mga bata nga mobisita kanila atol sa maong kalihokan nga gipahigayon na matag tuig. (Cebu City Public Information Office PIO/Greggy Jiggs P. Senados)