Batakang Serbisyo Dalhon Sa Tugkaran Sa Mga Sugbuanon

Kabahin sa misyon sa pang-gobiyerno ni Mayor Michael Lopez Rama mao ang pagdala sa batakang serbisyo ngadto sa tugkaran sa mga Sugbuanon. Dili man kini literal nga tugkaran sa ilang mga panimalay apan ngadto gayod sa ilang tagsa-tagsa ka mga barangay.

Agig pag tuman niini, sukad niadtong tuig 2010 gitukod ni Mayor Rama ang programang ‘City Hall at Your Doorstep’ diin ang 22 ka mga departamento sa kagamhanan ning dakbayan magpahigayon ug senemana nga community outreach nga kalihokan. Kini pinaagi sa pagdala sa tanang batakang serbisyo niini ngadto sa mga kabarangayan ning dakbayan.

Karong semanaha, ang ‘City Hall at Your Doorstep’ ipahigayon ngadto sa Barangay Lahug karong Pebrero 4 Huwebes ngadto sa Sitio Kamagong ug karong Pebrero 5 Biyernes ngadto sa Sitio Avocado sa susamang barangay.

Ang senemanang kalihokan nga nailhan usab nga ‘Piyesta sa Pagpangalagad’ sugdan ug usa ka Santos nga Misa sa alas-8 sa buntag dayon sundan kini sa pormal nga pag-abli niini ug molungtad na hangtod nga maserbisyohan ang tanan.

Kahinumduman nga miabot ug gatosan ngadto sa liboan ka mga lumulopyo kada barangay ang naka benepisyo ning libreng mga batakang pagpangalagad nga gidala sa maong outreach program.

Ang maong programa nagahatag ug batakang panerbisyo sa katawhan sama sa libreng konsultasyon sa rehistro sa pagkatawo, pagpakasal, ug pagkamatay; libreng tuli alang sa mga kabataan; libreng medikal nga konsultasyon; pag-ibot sa ngipon; pagpang-limpyo sa mga kanal ug drainage; pagpanaod ug pagpang-ayo sa mga gripo ug street lights; libreng rehistro, kapon ug bakuna sa mga iro ug iring; libreng laboratory services sama sa blood typing ug blood sugar testing; libreng feeding ug timbang sa mga kabataan; pag-isyu ug Cedula; libreng pagpanghatag ug mga seedlings nga itanumay ug nagkadaiyang mga tambal ug bitamina; ug libreng seminar sa epekto sa pagamit ug ginadiling druga, paglikay sa sunog, ug mga kalambuan sa dakbayan, ug uban pa.

Giawhag usab ang tanang mga lumulupyo sa Barangay Lahug sa pagpahimulos sa maong higayon, aron dili na sila mahasol, makagasto ug mahago pa sa pag-adto sa nagkadaiyang buhatan sa Cebu City Hall. (Cebu City Public Information Office PIO/Greggy Jiggs P. Senados)