Unibersidad sa Bukid, Manawat nag Estudyante

Ang mga tinun-an nga anak og kabus nga pamilya sa kabukiran sa dakbayan sa Sugbo makahimo na pagtungha sa koleheyo nga dili na kinahanglang anhi pa moeskuwela sa mga dagko’ng unibersidad sa siyudad.

Si Kongresista Rodrigo “Bebot” Abellanosa mipahibalo nga sugod karong Hunyo 15 magsugod na ang klase sa Cebu Technological University-Mountain Extention.

Mentras wala pa’y namugna nga school building, ang barangay sports complex sa Barangay Babag ug Sudlon II maoy temporary nga himuong tunghaan.

Gani karong adlawa gikataho nga magsugod na ang pagpanawat sa mga aplikasyon adto sa Barangay Hall sa Babag kay seryoso sila nga magsugod g’yud ang klase pagka Hunyo 15.

Matud ni Kongresista Abellanosa nga gituohan nga adunay mga 300 ka college students ang mopahimulos niini nga prebiliheyo sa kagamhanan nga gihatag kanila.

Daghang mga anak sa mga kabus nga pamilya sa kabukiran ang wala makapadayon sa pagtungha sa koleheyo tungod kay kuwang og panggasto ang ilang mga ginikanan.

Bisan og adunay college scholarship grant ang dakbayan nga tag P10,000 matag semester, apan gawas nga kuwang kini ibayad sa bayranan sa tuition, kadto’ng tua magpuyo sa bukid magkinahanglan pa og gasto sa pletehan ug abangan.

Matud ni Abellanosa nga paninguhaon niya nga wala na’y dugang bayranan ang mga moeskwela sa CTU Extention School kay ang CHED adunay programa nga gitawag og Tulong Dunong Program.

Si Abellanosa nakakuha og pasiuna’ng budget nga P6 milyones gikan sa Departmen t of Budget and Management (DBM), alang sa pasiuna nga mga gastohanan.

Dugang pa niini, ang Department of Public Works and Highways (DPWH) mipasalig nga mohatag og P34 milyones alang sa pagtukod og school building, samtang maninguha usab si Abellanosa nga makakuha siya og dugang P40 milyones gikan sa Pagcor.