“Tugbong Tabo” Nagpadayon

Gatosan ka mga miyembro sa Cebu City Farmers Federation ang padayong natabangan sa “Tugbong Tabo” nga programa ni Mayor Michael Rama pinaagi sa City Agriculture Department kon CAD.

tugbong_tsboTungod sa maong programa direkta na nga makapamaligya sa ilang mga produkto sama sa mga prutas, utanon, lagotmon, buwak, ug uban pa ngadto sa mga kosumidor ang mga mag-uuma ning syudad sa Sugbo ug dili na moagi pa sa mga komprador ug negosyante.

Si Mayor Rama nangunay gyod sa pag-atiman sa mga panginahanglanon sa mga katawhang Sugbuanon hilabina sa kabukirang barangay ning dakbayan nga layo sa sentro sa syudad ug sa dugayng panahon nahikawan sa mga kaayohan ug mejoras.

Ang 36 ka mga kabukirang barangay sa 80 ka mga barangay ning dakbayan gipalambo sa Mayor pinaagi sa pagbubo ug mga proyekto ug programa hilabina sa imprastraktura ug agrikultura. Sa ekonomiya sa syudad sa Sugbo, dako nga porsyento ang natampo sa sektor sa agrikultura nga mokabat sa 20 porsyento.

Sa pakighinabi sa BARUGG News, matod pa ni Mr. Joey Baclayon ang hepe sa CAD nga, “Dili lang ang pagpadangat sa mga bag-ong teknolohiya sa mga kabukiran kun dili apil ang paghatag ug kahigayonan sa mga mag-uuma nga maka-display ug makapamaligya sa ilang mga agricultural products ngadto sa mga areas sa Tugbong Tabo.”

Dugang gipasabot ni Baclayon nga ang mga areas sa Tugbong Tabo naglangkob sa Cebu Business Park sa Ayala, Apas, Mabolo, Mambaling, San Roque, Sambag 1, Quiot, Talamban, Plaza Sugbo ug lakip na sa Cordova.

“Sa Plaza Sugbo aduna tay Tugbong Tabo o Agro Fairs kung adunay okasyon ug adunay kini ordinansa nga regular kining ipahigayon. Miabot pod ta sa Cordova gumikan sa request sa mga mag-uuma ug mamalitay,” dugang pa sa hepe sa CAD.

Gibutyag usab ni Baclayon nga hugot usab ang pagsuporta ni Mayor Rama sa ‘Alternative Marketing for Farmers’ ug lakip na sa ‘Farmer’s Entrepreneurship Program’ diin ang mga mag-uuma gitabangan sa pag-ugmad ug pananom ug mga in-demand nga produktong agrikultural uban sa pag-abag sa mga institutional buyers ug mga stakeholders sa programa.

Gikalipay usab sa mga mag-uuma ning Syudad ang paglusad sa naasoyng programa gumikan sa oportunidad nga mapalapdan pa ang ilang kitaan ug aduna na silay laing pwesto diin sila makapamaligya. (Cebu City Public Information Office PIO/Greggy Jiggs P. Senados)