Telco Nagpatabang sa Publiko

Ang kadagkoan sa Globe Telecom miawhag na sa publiko nga tabangan sila pagbantay sa ilang mga linya sa kumunikasyon nga sagad pangawaton ug makabalda sa ilang pagserbisyo sa mga telephone subscribers.

Si Dong Guevarra sa Globe miingon nga karon lang tuiga, dul-an na sa 100 ka mga pagpangawat sa ilang alambre ang nahitabo hinungdan nga nabalda ang ilang serbisyo sa publiko.

Gani adunay nabiktima ug naputlan sa internet connections sulod sa duha ka semana tungod kay ang “cable wire” sa Globe Telecom sa Barangay Busay gikawat udtong tutok.

Si Guevarra miawhag sa katawhan nga kun aduna sila’y mabantayan nga mga tawo nga mosaka sa mga poste ug mamutol og alambre motawag dayon sila og mga polis aron madakpan kini.

Ang mga opisyal sa Globe-Manila miingon nga wala gayud sila’y mahimo kun ang ilang mga alambre pangkawaton.