Suspetsadong Drug Pusher Kilid sa Kampo, Sikop

● Gikatahong drug pusher nga anaa namaligya sa iyang drugas kilid sa kampo sa kapolisan, nasikop human sa dinaliang operasyon

Na-insulto ang kapolisan nga adunay usa ka drug pusher nga diha ra gyud mamaligya og shabu kilid sa Camp Sotero Cabahug, ang headquarters sa kapolisan diha sa Gorordo Avenue, dakbayan sa Sugbo.

Kini maoy hinungdan nga gitagad dayon sa mga awturidad ang nadawat nila nga inpormasyon ug misangpot sa pagkasikop niadtong Myerkules sa udto sa suspetsado’ng drug pusher nga si Roel Laborte.

Matud sa mga sakop sa City Intelligence Branch (CIB) nga si Laborte giisip nila nga “Level 2” drug pusher ug kini makabaligya og subra sa tunga sa kilo nga shabu sa usa ka semana. Ang dapit nga gipuy-an ni Laborte gitawag og Purok 3, sakop sa Barangay Kamputhaw nga kaniadto gitawag og PC Compound kay anaa sagad magpuyo ang mga sakop sa Philippine Constabulary.

Matud pa ni Senior Inspector Gomercindo Mandaue, nga maoy nangulo sa mga sakop sa CIB, nga naglisod sila sa pagpahigayon og buy-bust operation kay ang gipuy-an sa suspek anaa mahimutang sa sudlonon nga bahin.

Sagad nga ang agianan paingon sa gipuy-an ni Laborte adunay magbantay ug mopahibalo kaniya kun adunay katingad-an nga gituohan nila nga mga tinugyanan sa balaod.

Apan pasado alas 12 sa udto, nakahigayon ang kapolisan nga nalipat ang mga alalay sa 46-anyos nga si Laborte ug nakasulod sila dayon mipalit og shabu.

Matud sa kapolisan nga nakuha nila gikan ni Laborte ang 21 ka pakete sa gituohan nga shabu kantidad tag 1000 ka pesos, usa ka medium-sized og large sized pack nga mikantidad tanan og P70 mil.

Matud pa nga dunay mga call center agent nga suki sa drugas ni Laborte.