Supporta sa PDEA Susihon Ni Rama

Gusto ni Mayor Michael Rama nga sutaon kun unsa nga mga suporta ang nadawat sa Philippine Drugs Enforcement Agency (PDEA) gikan sa nasudnon nga kagamhanan.

Wala dayon mohimo’g bug-at nga kumentaryo ang mayor kabahin sa pagkyugpos lang sa mga sakop sa PDEA dinhi sa Sugbo mahitungod sa problema sa ilegal nga drugas.

Daghan ang nakabantay nga samtang ang kapolisan paspas nga mihimo’g pagpangronda ug pagpanakop sa mga tigpayuhot og ilegal nga drugas apan ang PDEA wala gayud mohimo’g operation sa mga ilado’ng tigpayuhot og gidili’ng drugas dinhi sa Sugbo.

Ang PDEA kabahin na karon sa Police Coordinating and Advisory Council (PCAC) nga magtigum na uban sa mga opisyal sa kagamhanan sa dakbayan, ilabi na sa City Anti-Drug Abuse Council.

May nagduda nga ang mga sakop sa PDEA gibayran sa mga druglord aron dili mohimo’g pagpangronda batok sa ilang negosyo, apan si Rama miingon nga iya usa kini nga pahimoan og pakisusi.

Ang PDEA direkta nga ubos sa pagdumala sa Office of the President (OP) sa Malacañang.

Ang kapolisan dinhi sa Sugbo, ilabi na ang Regional Special Operations Group (RSOG), Regional Intelligence Division (RID), National Bureau of Investigation (NBI) ug mga special units sa Cebu City Police ug Provincial Police Office, paspas nga mihimo’g mga operation batok sa drugas apan ang PDEA walay gihimo.