Sugbo Gustong Mo-abag sa Zamboanga

Si Mayor Michael Rama gusto nga ang dakbayan sa Sugbo mohatag og hinabang-salapi ngadto sa Zamboanga aron kapahimuslan sa mga nabiktima sa sunod-sunod nga mga sunog.

Nakapanglingo-lingo si Rama nga nagbasa sa report sa mantalaan nga miabot na og kapin sa napulo ka libo ang nawagtangan og panimalay tungod sa sunog sa Zamboanga nga gituohang gihimo sa mga rebelde.

Adunay nagtoo nga ang sunog gihimo aron nga matakli ang pagtagad sa militar ug mahunong ang paggukod nila sa mga rebelde nga sakop sa Moro National Liberation Front (MNLF) nga mi-hostage karon og mga 20 ka tawo.

Ang mga bombero nagpanuko sa pagresponde pagpawong sa kayo tungod sa pagtoo nga ang maong sunog gihimo sa mga sakop sa MNLF aron sila makahimo og pagpangatake sa mga tropa sa kagamhanan.

Daghan ang nagtoo nga daghang Sugboanon nga tua manimuyo sa Zamboanga og naapil sa nasunogan mao nga ang dakbayan kinahanglan gayud nga motabang kanila.

Gipasusi ni Mayor Rama kon pila na lang ang nahabilin sa Calamity Budget para karong tuiga aron makabana-bana sila kon pila ang igahin nga kantidad para sa mga nasunogan.

Ang dakbayan migahin og kapin sa usa ka gatus ka milyon ka pesos karong tuiga para sa Calamity Budget. Ang balaud naglatid nga ang singko porsiento sa Annual Budget igahin gayud isip Calamity Funds.

Matud ni Rama nga naandan na nga ang dakbayan sa Sugbo motabang gayud sa ubang Local Government Units (LGU) nga masabot nila nga magkinahanglan og tabang panahon sa mga katalagman.