Senior Citizens Council Mopatuman sa Moratorium

Kadtong mga nag-edad na og subra sa 60-anyos nga gusto’ng mo-apply og cash assistance gikan sa dakbayan sa Sugbo lapas Hunyo 15 karong tuiga dili na dawaton sa Office of Senior Citizens Affairs (OSCA).

Si manlalaban Jose Daluz III nga sinaligan ni Mayor Michael Rama mipasabot nga kini maoy ilang pang-alkontra sa daghang mga senior citizens nga gikan sa lagyo nga dapit nga moanhi lang aron magparehestro og maka-avail sa dagko nga cash assistance.

Matud ni Daluz nga ang dawaton nila og i-process ang mga dukomento mao kadtong motangkud na nga 60-anyos ug botante gayud dinhi sa dakbayan sulod sa milabay’ng katuigan.

Ang mga sakop sa Senior Citizens Council nagkauyon nga adunay ipatuman nga moratorium nga kadtong nag-edad og subra na sa 60 og mo-apply og cash assistance lapas sa Hunyo 15 dili na dawaton.

Gibutyag ni Daluz nga daghan kaayo nga mga senior citizens nga tua na manimuyo sa lagyo nga dapit sa Kabisay-an ug Mindanao apan dunay mga anak dinhi sa dakbayan miparehestro lang pagbalik og nagpatoo nga dia manimuyo sa dakbayan.

Matud ni Daluz nga katingad-an kaayo nga ang maong mga senior citizens wala makaparehestro dihang ang paghatag og cash assistance gisugdan sa paghatag atul sa termino ni kanhi Mayor Tomas Osmeña.

Kapin sa 60,000 ka seniors ang nalakip sa lista sa mga hatagan og tag P2,000 atul sa duha ka adlaw nga pagpang-apud-apod sa cash assistance kaniadtong Biyernes ug Sabado.

Dunay kapin sa 1,000 ka seniors ang wala makakobra sa barangay kay nangahanaw ang ilang mga ngalan ug didto masukip sa lista sa lain nga barangay.

Usa kanila mao si Eduardo Olmido nga taga Punta Princesa apan ang iyang ngalan didto naapil sa mga beneficiaries sa Barangay Labangon. Kadtong wala makakobra sa barangay, makahimo nga mokobra sila sa City Hall apan kinahanglan nga dili molapas sa 15 ka adlaw.