Sakop sa CITOM, Napositibo

Sa 46 ka sakop City Traffic Operations Management (CITOM) nga gihimoan og kinalit nga drug-test, duha kanila ang napositibo sa ilegal nga drugas.

Ang kinalit nga drug test gipahigayon sa mga sakop sa City Office for Substance-Abuse Prevention (COSAP) kagahapon Miyerkoles tungod sa hangyo ni CITOM Executive Director rafael Yap.

Si CITOM Operations Officer Joy Tumulak mitug-an nga parking aide ug traffic enforcer maoy namatud-an nga tiggamitan og ilegal nga drugas sa drug test nga gihimo sa mga sakop ni COSAP Chief Alice Utlang.

Matud ni Utlang nga 46 ka sakop sa CITOM ang naglangkob sa una nga batch sa mga traffic enforcers ug traffic aides ang gipailawom nila og drug test. Adunay 500 ka sakop ang CITOM apan wala itug-an kun kanus-a na usab i-drug test ang uban.

Si Tumulak wala makatug-an kun taktakon ba dayon nila ang mao nga mga kawani nga napositibo.

Ang COSAP usab mi-drug test sa tanang kawani sa Barangay Tabunan ug walay bisan usa kanila nga napositibo sa ilegal nga drugas, gawas sa tulo nga wala makaapil sa drug test.

Si Utlang miingon nga dili pa sila makadeklarar nga drug-free ang Barangay Tabunan hangtod nga ang tulo makuhaan og drug test unya mamatud-an nga dili sila tiggamitan sa ilegal nga drugas.

Miabot na og 105 ka kawani sa kabarangayan ug sa dakbayan ang napositibo sa ilegal nga drugas sukad nga ang COSAP mibalik sa paghingusog sa pagpahigayon og surprise drug test.

Matud ni Tumulak nga wala siya masayod kun taktakon ba ang duha ka kawani sa CITOM nga namatud-an nga mogamit diay og gidili nga matang sa drugas.

CPPO

Samtang negatibo ang tanang 40 ka polis nga sakop sa Cebu Provincial Police Office (CPPO) nga gipakalitan og drug test kagahapon, apan adunay laing napulo nga wala motunga.

Matud ni Chief Inspector Rodolfo Albotra, hepe sa Provincial Intelligence Branch (PIB), nga iyang ipatawag ang 10 ka polis nga wala motunga sa maong drug test aron makapasabot sila kun ngano nga dili sila silotan.