Problema sa Taas nga Singil sa Tubig Tubagon sa MCWD

Tungod sa kamahal sa tubig nga gibaligya sa mga barangay sa kabukirang bahin sa dakbayan sa Sugbo adunay mga pamilya nga mihimo’g paagi nga mabalik-balik nila paggamit ang tubig aron makadaginot.

Nakapanglingo-lingo si Rene Mercado, ang tsirman sa Metro Cebu Water District (MCWD), diha nga gisaysayan siya sa MetroCebuNews sa kaagi sa usa ka construction worker nga taga Sitio Fatima nga sakop sa Barangay Apas.

Ang pamilya sa trabahante nga si Lalaw — Estanislao ang tinuod nga ngalan — mokunsumo lang og usa ka cubic meter nga tubig sa usa ka buwan.

“Sigi ngay, atong tabangan ang mga pamilya nga nagpuyo sa maong lugar aron makonektahan sila’g tubig,” matud ni Mercado dihang giinterview ning tagsulat.

Dunay koneksyon sa tubig ang mga nagpuyo sa Sitio Fatima, apil kadtong tua mahimutang sa ibabaw sa bungtod apan “sub-connection” sila sa pipila ka tawo nga mipakonektar kanila’g tubig apan mahal ang bayranan.

Ang MCWD mokolekta lang og P13.60 sa matag cubic meter nga tubig (bali’g lima ka baril kon, 50 ka container o 1,000 ka litros) sa unang napulo ka cubic meter nga konsumo’s tubig.

Kon subra na sa napulo ka cubic meter nga tubig apan dili mosubra sa 20 cubic meters tag P15 na ang bayranan, unya P17.65 ang mata’g cubic meter kon ang konsumo molapas sa 20 cubic meter apan dili molapas sa 30.

Lapas sa 30 cubic meter nga tubig, ang bayad tag P48.40 na sa matag cubic meter. Apan samtang daghan ang gimahalan na sa maong kantidad, ang mga kabus nga pamilya nga nagpuyo sa mga dapit nga wala pa maabot sa koneksyon sa MCWD napugos pagpalit og mahal nga tubig.

Adunay pipila ka negosyante nga maoy migasto alang sa daghang tubig nga gikinahanglan ug maoy mipakonektar og tubig sa maong mga pamilya apan magpabayad siya og tag P75 ang matag cubic meter nga tubig nga ilang magamit.

Kini maoy hinungdan nga tungod sa grabeng kamahal sa tubig, daghan sa mga nagpuyo sa Upper Sitio Fatima nga kon maligo motungtong sa planggana aron ang tubig nga masawod gamiton na usab alang sa pang-flash sa pansayan ug uban pang kagamitan.

Si Lalaw mitug-an nga magdaginot gayud siya sa tubig kay dili magsilbi ang iyang sweldo nga usahay tag P200 ra ang adlaw ug usahay dili usab siya makatrabaho.

Laing paagi sa mga nagpuyo sa mga dapit nga dili pa maabot sa koneksyon sa MCWD mao ang pagsawod og tubig kon adunay uwan aron nga makadaginot sila sa gastohan.

Gipasalig ni Mercado nga paninguhaon nila nga molambo pa ang serbisyo sa MCWD aron maputol na ang sakripisyo sa maong mga pamilya nga nag-antos sa kanihit nga tubig sa ilang lugar.