Pletehan Sa Abyon, Mikunhod

Human matangtang ang fuel surcharge, gikompirmar sa Civil Aviation Board (CAB) nga mipakunhod na sa pletehan ang tanang kompaniya sa abyon sa nasud.

Matud pa ni Elvira Bongosa, information officer Philippine Information Agency (PIA) nga mao kini gitino ni CAB Executive Director Carmelo Arcilla, atol sa commitee hearing nga gipangunahan sa House Committe on Transportation sa miaging semana.

Nagkanayon si Bongosa nga gituman na sa mga tag-iya og eroplanong pasaheroan ang resolusyon nga gipagawas sa mga magbabalaod niadtong Enero 8, nga gipa-epekto niadtong Enero 12.

Nidugang si Bongosa nga may duha ka pagpaminaw nga gipahigayon sa CAB sa wala pa ipagawas ang maong resolusyon.

Sumala ni Bongosa nga sa susamang pagdungog, gikompirmar nila ni Cebu Pacific President ug CEO Lance Gokongwei, Philippine Airlines (PAL) Sr. Vice President on Airline Operations Ismael Gozon ug AirAsia Zest Philippines CEO Joy Cañeba nga gitangtang na nila sa pletehan ang fuel surcharge.

Hinuon, alang kang Bongosa, wala pa ikasulti sa maong mga tag-iya ug tagdumala sa mga abyong pasaheroan kun pila ang ilang gikunhod sa pletehan.