Paris Agreement on Climate Change, Gilagdaan na ni President Duterte

Gilagdaan na ni Presidente Rodrigo Duterte ang Paris Agreement on Climate Change nga mag-obliga sa mga nasod nga kunhoran ang ilang greenhouse gas emissions ug iduso ang pagpaugmad sa renewable energy.

Sa usa ka pahayag, miingon si Climate Change Commissioner Manny de Guzman nga gikalipay niya ang gihimong pag-ratipika sa Presidente sa Paris Agreement.

Matud pa nga senyales kini nga nagbunga na ang ilang pagpaningkamot nga ipabilin ang 1.5 degree climate goal niadtong gipahigayon nga negosasyon sa Paris ug ang pagtuman sa Presidente sa iyang saad nga nag-unang prayoridad sa iyang administrasyon ang resolbahon ang climate change alang sa mga kabos nga Pilipino.

Ang maong gilagdaang dokumento gitawag nga ‘Instrument of Ratification’ iduso sa Senado karong alas 2 sa hapon ug dawaton kini ni Sen. Loren Legarda isip pangulo sa climate change committee aron ma-concur na ang ratipikasyon niini.

Gisugdan ang proseso sa ratipikasyon sa pagsumite og certificates of concurrence (COC) sa mga ahenisya sa gobyerno sa Office of the President. Si Legarda nga usa ka United Nations Global Champion for Resilience, ang miseguro sa ratipikasyon sa nahisgotang kasabotan nga nagtinguhang kunhoran ang epekto sa climate change. (ecb/PIA7-Bohol)