Opinions
Panuhot
Kini ang bunga sa hanging manuhotsuhot,
Modatom sa kinahiladman unya magpuot,
Pagbantay lang sa mga bagotbot, sa mga wala mahimuot.
Kay kon dili kini kapugngan, kini mogawas ug mahimong UTOT.
“Nahibalo ka Osting, ganahan kaayo ko nimo, komedyante ka ug manggihunahunaon ngari nako. Salamat ha. Imo kong gikuyogan.” ni Sally nga mapahiyomon.
“Sally, sayod ka bitaw nako basta ikaw na gani dili ko kabalibad. Ang imong katahom dili nako mapalgan sa uban. Ikaw ang manulunda sa akong agianan.” dala duko-duko nga pamulong ni Osting nga midip-ig sa babayeng hinalaran.
Sa kalit lang mibati si Osting ug pag-alindasay, wala makapugong. Nakapabuhagay.
“Sus, nakapagawas man ko sa akong panuhot. Wala nako kapugngi. Ah, pasagdi lang, maayo gani kay walay tingog. Naay silencer. He, he, he.” namulong si Osting sa kaugalingon.
“Pweeh.. Osting, unsa man ron? Kalain gud arong bahoa.” ni Sally nga pwerting nakapanampong sa iyang ilong.
“Bitaw no.” Ni Osting pa nga mibarog. Murag nahibulong.
“Osting, mura man ron ug “uts”…” ni Sally nga wala motiwas ug litok sa pulong utot agi ug pagrespeto ni Osting. Iyang gitutokan si Osting human makatan-aw sa palibot ug nakasuta nga walay laing tawo gawas nilang duha.
“Sally, mas maayo pa ani, molakaw sa ko kadali aron pangitaon nako ang gigikanan sa atong napanimahoan. He, he. Pero sabta lang sa ko ha. Kon unsa man ang imong napanimahoan. Sabta nga komedya lang ning tanan. Sige ha, molakaw nako basin ug makakomedya na sab ko.” dala palusot ni Osting sa iyang pagkasikop.
Nasabtan ni Sally nga si Osting gyud ang nagdala sa nasingohang hangin nga gitawag niya’g “uts”… Wala na makatingog si Sally. Pabiling nanampong sa iyang ilong ug baba. Walay pupamilok.
