Pansayan:Problema sa Mga Biktima sa Sunog Sa Brgy. Lorega

Ang mga biktima sa sunog sa Barangay Lorega-San Miguel nakabalik na pagtukod og ilang kapuy-an apan nag-antos gihapon sa kalisod kay sagad kanila wala pay gihimo nga mga pansayan.

Sagad sa mga pamilya nga mibalik na pagtukod og panimalay miuna paghimo’g barung-barong aron aduna sila’y kapuy-an ug kapasilongan, ilabi na kun mag-uwan apan wala pa sila maghimo og ‘comfort rooms’.

Ang ilang gisaligan mao ra ang mga “movable comfort rooms” nga gipagamit sa dakbayan sa Sugbo. Ang uban usab mireklamo tungod kay ang dakbayan igo lang mipatag-patag sa ilang kapuy-an apan wala maghimo og drainage systems.

Nagpasabot nga kun adunay uwan maglaaw ang tubig kay wala may kanal ang ilang nahimutangan.

Si Ally Linte nga adunay upat ka anak nabalaka sa kahimtang sa ilang panglawas kay gawas nga wala pa sila’y kuryente wala usab sila’y klarong pansayan ang sagad sa mga pamilya.

Human sa gihimong re-blocking, patas na ang gidak-on sa ilang luna nga katarokan og panimalay nga may sukod nga “12 ft. x 13 ft”.

Apan ang laing biktima sa sunog nga si Visitacion Intinia nagkanayon nga ang maong gidak-on sa ilang balay mas maayo na lang kun itandi sa walay kapuy-an o kapasilongan.

Aron dili sila maghuot pagpuyo sa gamay’ng luna, kadto’ng mga dagko’ng pamilya nga adunay kwarta nagbutang og ikaduhang andana.

Si Cebu City Administrator Lucelle Mercado mipahibawo nga adunay laraw nga magbutang og arko diha sa entrada nga bahin sa bag-ong karsada nga nahimutangan sa gipangtukod nga kabalayan aron nindot kining tan-awon.

Si Mercado miawhag sa mga nasunogan nga mosalmot sa livelihood programs nga gipasiugdahan sa siyudad ug dili kini magsalig sa pinansiyal nga hinabang nga ihatag sa gobyerno.

Dugang ni Mercado nga daku og matabang sa ilang inadlaw nga panginahanglanon ang maong mga livelihood programs.

Image Credit: cebudailynews.inquirer.net