P8.8 Milyones Gisugyot Alang Paglimpyo sa mga Kanal

Kapin sa P8.8 milyones ang gisugyot nga kantidad aron gastohon sa pagpanglimpyo sa mga kanal sa pipila ka mga karsada aron malikayan ang mga paglunop dinhi sa dakbayan sa Sugbo.

Matud ni Konsehal Roberto “Bob” Cabarrubias nga maoy tsirman sa Committee on Infrastracture nga ang kuwarta adto kini kuhaon sa Annual Budget kaniadto’ng tuig 2012.

Si Cabarrubias miingon nga ang P5.3 milyones gastohon kini sa pag-rehabilitate sa mga kanal sa dalan Colon gikan sa eskena Mabini paingon na sa Guadalupe River; sa P. Lopez ug Magallanes Streets ug sa palibot sa University of San Jose Recoletos, ingon man sa Osmeña Boulevard gikan sa Colon ngadto na sa M. J. Cuenco Avenue.

Samtang kapin ‘sab sa P2.9 milyones ang gastohon paglimpyo sa mga kanal sa Borromeo Street gikan sa eskena Manalili paingon na sa Leon Kilat. Apil usab sa trabahoon mao ang kanal sa Osmeña Boulevard gikan sa Manalili paingon sa P. Burgos Street, ug ang Osmeña Boulevard gihapon gikan sa Colon ngadto sa dalan Sanciangko.

Gisugyot usab ni Konsehal Cabarrubias ang paggasto og P607 mil nga gasto alang sa drainage improvement projects sa Legazpi Street gikan sa dalan D. Jakosalem paingon sa M.J. Cuenco Avenue.

Matud ni Cabarrubias nga adunay panginahanglan nga panglimpyohan ug pang-ayuhon ang atong mga kanal agi’g pagpangandam sa nagsingabot nga tinguwan.

Sa miagi’ng tuig sagad g’yud nga masinati ang grabe’ng paglunop sa lainlaing dapit sa dakbayan panahon nga adunay kusog nga uwan kay barado na ang mga kanal. Gipanglantawan hinuon nga dili gihapon masulbad ang paglunop sa dakbayan kay ang palimpyohan nila nga mga kanal wala gayud makaabot sa dagat.