NFA Di Makapugong sa Misakang Presyo sa Bugas

Giangkon sa National Food Authority (NFA)-7 nga walay mahimo ang ilang buhatan sa pagpakonhud sa prisyo sa mga commercial rice sa kamerkadohan dinhi sa Central Visayas bisan pa man og nagsugod na ang ting-ani sa mga kahumayan sa nasud.

Nasayran nga sa miaging bulan misaka og P2 ang prisyo sa bugas tungod sa nihit nga supply niini.

Apan hangtud karon wala gihapon kini mikonhud bisan og daghan na ang stock sa bugas nga miabot dinhi sa Cebu ug sa Central Visayas.

Ang tigpamaba sa NFA-7 nga si Ma. Lucia Rosales mibutyag nga ang ilang buhatan way katungod sa pagkontrolar sa prisyo sa mga commercial rice, apan ang ilang dakong katungdanan mao ang pagsiguro nga may igong stock sa maong batakang pagkaon.

Katungdanan usab nila ang pagsil-ing kanunay sa mga bodega sa bugas pagsiguro nga dili mahubsan niining maong supply ang kamerkadohan.

Si Rosales mipahibawo nga may daghan na nga supply sa bugas dinhi sa Cebu ug ubang probinsiya sa Central Visayas nga gikan sa Central Luzon, Isabela ug Mindoro.

Mitambag hinuon si Rosales sa mga konsumedor nga papaliton kini og NFA rice sa ilang mga retailer sa nagkadaiyang kamerkadohan dinhi sa syudad ug sa lalawigan sa Sugbo.

Kini tungod kay ang mga commercial rice, sama sa mga premium rice nga may prisyo nga dili mominus sa P48 matag kilo, ug ang fancy variety sama sa Ganador nga anaa sa tag P50.00 matag kilo, gibase usab kini sa negosyante og bugas gikan sa ilang komprada sa mga mag-uuma.

Apan gitumbok ni Rosales nga ang NFA rice nagpabilin sa P27 ang prisyo matag kilo hinungdan nga iyang gitambagan ang mga konsumedor nga angay kining mopalit sa NFA rice kansang kalidad susama ra sa commercial rice.