Minatay Gikitkit sa Ilaga

Naalerto karon ang mga tinugyanan sa Cebu City Medical Center (CCMC) tungod sa report nga dunay minatay nga gipahiluna sa ilang temporaryo nga morgue nga gikitkit sa mga ilaga ang ilong.

Matud ni Rey Cris Panugaling, ang director for administration sa CCMC, nga giimbestigahan na kini karon kun ngano nga nakasulod man ang mga ilaga sa cadaver’s holding area nga gihimo sa container vans.

Si Panugalingon miingon nga unom ka trabahante ang gipaubos nila sa imbestigasyon aron molutaw ang kamatuoran ngano nga kini nahitabo.

Wala gibaliwala ni Panugaling nga tinuod nga ilaga maoy mikitkit sa ilong sa minatay, apan dugang niya nga mao kini ang una’ng kaso sa hospital.

Si Golddy Amor Siton, igsuon sa namatay, miingon nga nakugang sila pagkakita nga wala na’y ilong ang namatay niya nga igsuon nga si Harold Siton.

Matud ni Golddy nga dako siya’g pagtuo nga gikitkit kini sa ilaga tungod pag-abli nila sa pultahan sa morgue adunay upat ka dagko’ng ilaga nga naglumba sa pagpanagan.

Nagkaestorya na ang pamilya sa patay’ng lawas ug ang kadagkoan sa CCMC aron mahibaw-an kun unsa g’yud ang tinuod nga nahitabo sa ilong sa namatay.

Matud ni Panugaling nga sirado ang container van nga gibutangan sa patay’ng lawas ni Harold nga namatay human mapusili didto sa Barangay Pardo.