Mga Residente Sa Punta Princesa Natabangan

Liboan ka mga residente sa Barangay Punta Princesa ning syudad ang natabangan sa libreng serbisyo sa kagamhanan sa dakbayan sa Sugbo pinaagi sa programa ni Cebu City Mayor Michael Rama nga gitawag nga ‘City Hall At Your Doorstep’ kon ‘Piyesta sa Pagpangalagad’ nga gipahigayon sa Vicente Sotto Memorial Gymnasium karong adlawa Mayo 2, 2016 Lunes.

Si Lola Carina Romayla, 65, kinsa nagdala sa iyang apo aron sa pagpakonsulta sa doktor ug pagpangayo ug tambal sa iyang sakit nga ulcer usa lamang sa mga nakabenepisyo sa mga libreng serbisyo.

Sa pakighinabi sa BRAUGG News, gitataw niini nga, “Nalipay gyod mi ug nagpasalamat kang Mayor Rama nga gihatagan mi ug libreng serbisyo ug tambal. Dako na kaayo ni ug tabang namo kay lisod ang panahon karon kung wala kay kwarta dili ka makapakonsulta sa hospital.”

Samtang mipadangat usab sa ilang hugot nga suporta ug presensya ang mga opisyales sa maong barangay nga gipangulohan ni Kapitan Jose F. Navarro atol sa paghatag sa mga libreng serbisyo ngadto sa ilang mga konstituwente.

Gipaambit sa Kapitan nga dako iyang pasalamat ni Mayor Rama ug sa mga kawani sa dakbayan sa pagbisita sa ilang barangay. Gisasay usab niini nga dako na ug kalambuan sa ilang barangay sama sa mga brand new nga mga sakyanan ug kahimanan nga gihatag kanila ug nga wala sila pasagdi sa syudad ubos sa Administrasyon ni Mayor Rama nga wala nahatag sa buot moatbang niini samtang mao pay namunuan sa dakbayan.

Samtang naglangkob sa mga gitanyag nga serbisyo sa 22 ka departamento sa Cebu City Hall mao ang konsultasyon sa rehistro sa pagkatawo, pagpakasal, ug pagkamatay; mass feeding ug timbang sa mga kabataan; medikal nga konsultasyon; pagpang-limpyo sa mga kanal ug drainage; pagpanaod ug pagpang-ayo sa mga street lights; pagrehistro, kapon ug bakuna sa mga iro ug iring; pagtanyag ug laboratory services sama sa blood typing ug blood sugar testing; pagpanghatag ug mga seedlings nga itanumay nga mga herbal, prutas ug utanon; ug paghatag ug nagkadaiyang mga tambal ug bitamina, ug uban pa.

Dugang pa, ang kalihokan gipahigayon na matag adlawng Lunes hangtod sa Biyernes aron malukop ang 80 ka mga barangays nga naglangkob ning syudad kini diha sa paghatag ug serbisyo nga alang sa tanan. ( Cebu City Public Information Office PIO/Greggy Jiggs P. Senados)