Mga Residente sa Barangay Lahug Natabangan

Liboan ka mga lumolopyo sa Barangay Lahug ning syudad ang natabangan sa mga libreng serbisyo sa kagamhanan ning dakbayan pinaagi sa programa ni Mayor Michael Rama nga gitawag og ‘City Hall at Your Doorstep’ kon ‘Piyesta sa Pagpangalagad’ nga gipahigayon sa LCC Gymnasium sa maong barangay karong adlawa Nobiyembre 20, 2015 Biyernes.

Si Lola Teotima Borbon, 60 ang edad, usa lamang sa mga nakabenepisyo sa mga libreng serbisyo nga nagpa-check-up tungod sa iyang gibating paglabad sa ulo ug diabetes.

Sa pakighinabi sa BARUGG News, gitataw niini nga, “Pasalamat gyod ni Mayor Rama kay gihatagan mi ug libreng mga serbisyo, dako kaayo ni ug tabang sa mga katawhan labi na kadtong walay income, maayo lamang ug naa tay dakong income kay moderetso ra sa private doctors.”

Alang usab kang Lola Senerena Sano, 66 anyos, nga nagdala sa iyang apo ug nagpakonsulta sa doktor mipadayag kini nga, “Maayo ni nga programa ni Mayor Rama kay dako ug tabang sa mga pobre pareha namo ug angayan gyod ni ipadayon aron mas daghan pang matabangan.”

Naglangkob sa mga gitanyag nga serbisyo sa 22 ka mga Departamento sa Cebu City Hall mao ang konsultasyon sa rehistro sa pagkatawo, pagpakasal, ug pagkamatay; mass feeding ug timbang sa mga kabataan; medikal nga konsultasyon; pagpang-limpyo sa mga kanal ug drainage; pagpanaod ug pagpang-ayo sa mga street lights; pagrehistro, kapon ug bakuna sa mga iro ug iring; pagtanyag ug laboratory services sama sa blood typing ug blood sugar testing; pagpanghatag ug mga seedlings nga itanumay nga mga herbal, prutas ug utanon; ug paghatag ug nagkadaiyang mga tambal ug bitamina, ug uban pa.

Samtang gisugdan ang kalihokan ug usa ka Santos nga Misa nga gipangulohan ni Father Ike Herrera, pari gikan sa St. Therese Parish sa Barangay Lahug.

Bisan pa ug wala suportahi sa mga opisyales sa naasoy nga barangay ang maong kalihokan, sa kinatibuk-an nagmalampuson gihapon kini uban sa pagsalmot sa liboan nga mga residente niini.

Kahinumdoman nga ang maong barangay dugay na nga nahikawan sa mga proyekto ug mejoras hilabina sa milabayng administrasyon tungod sa politikanhong kaakohan sa namunoan niini.

Sa administrasyon ni Mayor Rama ang Barangay Lahug wala gyod pasagdi sa paghatag ug mga kaayohan ug proyekto. Gani bag-o pang nakadawat ang barangay ug bag-ong sakyanan nga personal mismo nga gidawat ni Lahug Barangay Kapitan Jovito Taborada Jr. didto sa Plaza Sugbo sa milabayng semana.

Dugang pa, karon usab ang unang higayon nga nahinayon ang pagpahigayon sa kalihokan sa maong barangay. Ang kalihokan gipahigayon na matag adlawng Biyernes aron malukop ang 80 ka mga barangays nga naglangkob ning syudad kini diha sa paghatag ug serbisyo nga alang sa tanan. (Cebu City Public Information Office PIO/Greggy Jiggs Senados)