Mga Polis sa Talamban Gikatahong Protektor sa Drug Pushers

●Halos katunga sa 43 ka mga polis nga nadistino sa Talamban Station ang napaubos sa pasangil nga mga ‘protektor’ sa mga tigpayuhot og shabu.

Giawhag ni Cebu City Vice Mayor Edgardo Labella ang katawhan nga motug-an sila kun kinsa ang mga sakop sa Talamban Police Station nga matud pa protektor sa mga drug pushers sa maong lugar, hilabi na sa Barangay Pulangbato.

Ang pamahayag ni Labella iyang giluwatan human nga nabulgar ang report nga halos katunga sa 43 ka polis nga nadistino sa Talamban PNP Station mga protektors sa mga tigpayuhot og shabu.

Kini gitug-an sa mga kapitan sa lainlaing barangay sa north district kanait sa Talamban atol sa tigum niadtong miaging semana sa mga sakop sa Police Coordinating Advisory Council (PCAC) nga gipangulohan sa bise mayor. Apil sa mitambong sa tigum sa PCAC mao ang mga kapitan sa Talamban, Pulangbato, Bacayan ug Budlaan.

Ang gidungog nga barangay sa north district nga gipuy-an sa mga drug pushers mao ang Pulangbato. Ang Sitio Dita, sakop sa Barangay Pulangbato, naila pag-ayo tungod kay daghan sa mga molupyo sa mao nga dapit nalambigit sa pagpamaligya og shabu.

Matud ni Superintendent Romeo Santander, hepe sa City Intelligence Branch, nga nakadawat usab siya og inpormasyon nga daghan sa mga polis nga nadistino sa Talamban mga drug protektors.

Si Senior Inspector Bienvenido Miral, ang hepe sa Talamban Police Station, nga gusto niya nga mahibaw-an kun kinsa kini’ng iyang mga sakop nga mga drug protectors.