Mayor, Konsehal Gitugutan nang Makig-kontrata sa mga Consultant

Ang dakbayan sa Sugbo mogasto og kapin sa tunga sa milyon ka pesos matag buwan alang ra sa paghatag og honorarium sa 40 ka consultants alang ni Mayor Michael Rama ug sa mga konsehal.

Giaprobahan sa mga sakop sa Cebu City Council ang tinguha ni Mayor Rama ug sa mga konsehal mao ang pag-hire og ilang mga consultants nga makatabang kanila sa ilang gimbuhaton.

Apil sa mga gikuha nga consultants ni Mayor Rama mao sila si kanhi mayor Alvin Garcia isip consultant alang sa Waterfront Development ingon man si kanhi Kongresista Antonio Cuenco alang sa Sister Cities-related matters.

Ang 21 sa maong mga consultants, apil nila ni Garcia ug Cuenco, magdawat og tag P18,000 nga honorarium matag buwan, samtang ang 17 ka consultants sa mga konsehal magdawat usab og tag P9,000 ang buwan.

Dunay usa ka consultant nga magdawat lang og P15,000 ang buwan ug ang usa P8,000.

Ang City Council mihatag og pagtugot ni Mayor Rama nga makigpirmahay og kontrata sa maong mga consultants aron makadawat sila og honorarium gikan sa Hulyo ngadto sa Disyiembre.

Kay tag P554,000 man ang magasto alang sa honorium sa mga consultants matag buwan, nagpasabot nga sa unom ka buwan nga termino sa ilang kontrata ang dakbayan makagasto og kapin sa P3.3 milyones sa ilang honorarium.

Ang lagda sa Civil Service Commission sa pagkuha og mga consultants mao nga mahimong legal ang pagsweldo og consultants kon wala g’yoy lain nga makamao sa ilang mga trabaho diha sa mga kawani sa mao nga local government unit.

Kabahin sa mga konsehal, ang ilang gikuha nga mga consultant maoy motrabaho sa paghimo og resolusyon ingon man mga ordinansahon samtang ang consultant sa mayor maoy tugyanan sa pag-atiman sa mga trabaho nga gusto niya’ng ipabuhat.

Upat ka kanhi konsehal nga sila si Franklin Seno, Arsenio Pacaña, Avenecio Piramide ug Rengelle Pelayo naapil usab sa mga consultants.