Mas Grabeng Ka Init Ang Masinati Tungod Sa Climate Change

Namahayag si Senador Loren Legarda nga mas grabeng kainit ang masinati sa umalabot nga mga adlaw ug katuigan tungod sa climate change.

Kini matud sa senadora nahitabo human napatik ang heat index sa milabayng mga adlaw ngadto na sa “danger levels.”

Niadtong Abril 11 mi rehistro sa dangerous level nga 51 degrees Celsius ang heat index sa Nueva Ecija ug sumala sa weather bureau, PAGASA duol na kini sa extreme danger level nga 54 degrees Celsius ang kainiton.

Samtang niadtong Abril 2 sa San Jose, Occidental Mindoro mi rehistro usab ang heat index ngadto sa 49.4 degrees Celsius.

Tungod niini ang PAGASA mipahimangno nga ang kainitong 41 degrees Celsius gadala ug peligro sa heat stroke, heat cramps ug heat exhaustion sa katawhan.

Dugang ni Legarda, ang average global temperature misaka ngadto sa 0.8 degrees Celsius sa tuig 1880 gani ang global warming milapaw na kini sa 1 degrees Celsius ug sa wala damha naka sinati na sa mga katalagman ang mga katawhan.

Matud ni Legarda, sa hitabo karon nga nagka grabeng init kinahanglang magpakabana na ang katawhan tungod sa peligro nga dala niini.

Atol unya sa kasaulogan sa Earth Day karong Abril 22, ang mga nasud magkahiusa na pag lagda sa gikasabutan nga Paris Agreement niadtong Disyembre didto sa New York.

Nauyonan sa Paris Agreement nga limitahan ang “global temperature rise within the century” ubos sa 2 degrees Celsius ug ubanan sa paningkamot nga dili kini mulapaw sa 1.5 degrees Celsius above pre-industrial levels.”

Aron maseguro ug matuman ang maong kasabutan, 55 ka nasud nga adunay 55 porsyento nga global greenhouse gas (GHH) emissions ang kinahanglang mopatuman ug molagda sa giingong kasabutan.

Mga nasud sa Fiji, Palau ug Marshall Islands ang una nga milagda niini. (lpp/PIA7/Negros Oriental)

Nagkanayon usab si Legarda nga tanang katawhan adunay katungod nga magpakabuhi apan sa nasinati nga tumang kainit sa panahon kinahanglan na nga hatagan ug dinaliang sulbad ang problema nga climate change. (lpp/PIA7/Negros Oriental)