Mandaue City Mitagana Ug P17M Sa Pagpaayo Sa Mga Tunghaan Nga Apektado Sa Bagyong Odette

Mitagana ug P17M ang lokal nga kagamhanan sa dakbayan sa Mandaue alang sa pagpaayo sa mga istruktura nga labing apektado sa nahitabong bagyong Odette niadtong Disyembre 16 sa miaging tuig.

Sumala pa ni Nimfa Bongo, Department of Education (DepED) Mandaue City Schools Division Superintendent nga ang maong alokasyon kun pondo naggikan sa Special Education Fund Supplemental Budget sa dakbayan.

Niadtong Agosto 15, pormal nga gi turnover ni Mayor Jonas Cortes ang pondo ngadto kang Bongo.

Gibutyag sab ni Bongo ang partikular nga ayuhon nila mao ang mga lawak sa tunghaan nga naguba gumikan sa maong bagyo.

Nasayran nga ang Mandaue City Comprehensive National High School (MCCNHS), Pagsabungan Elementary and National High School, Maguikay Elementary School ug Labogon National High School maoy labing apektado nga mga tunghaan.

Dugang ni Bongo nga sagad sa mga atop sa classroom sa MCCNHS maoy naguba kun napalid sa bagyo busa makadawat kini ug P7 million alang sa pagpaayo.

Ang nahabiling P10 million itagana sab kini ug bahinon sa laing pang mga tunghaan sa dakbayan.

Kahinumduman, nga niadtong bulan sa Marso, mitagana sab ug P20 million ang lokal nga kagamhanan alang sa pagpaayo sa 14 ka mga elementary ug highschool nga apektado gihapon sa bagyong Odette.

Mao kini ang mga tunghaan sa Tingub, Casili, Maguikay, Umapad, Banilad, Cabancalan II, Tabok I and II, Bakilid, ug Canduman Elementary Schools ug ang mga elementary ug high school sa Labogon ug Pagsabungan.

Sa katapusan, matod ni Bongo nga target nila nga mamahimong fully operational ang mga tunghaan karong Nobyembre atol sa implementasyon sa face-to-face classes lukop nasud.