Laing Senyor, Premyohan

Laing molupyo sa dakbayan sa Sugbo ang posible’ng magantihan na usab sa City Hall og P100 mil kay nakaabot kini sa pangedaron nga 100.

Si Konsehal Gerardo Carillo, tsirman sa committee on social services sa Cebu City Council, maoy misugyot nga gantihan sa City Hall si Dionesia Sadaya Atega, usa sa mga senior citizens dinhi sa dakbayan.

Matud ni Carillo nga si Lola Dionesia, taga 223-Elizabeth Pond, Barangay Camputhaw, dakbayan sa Sugbo mitangkod nga 100 kaniadtong Abril 17, sa miaging tuig. Karong Abril 17, si Lola Dionesia 101-anyos na.

Apan susihon pa g’yud ang ubang dukomento aron pagsuta kun si Atega lumad ba gayud nga taga dakbayan sa Sugbo.

Ang City Hall mogahin g’yud mata’g tuig og pundo alang sa paghatag og ganti niadtong mo-edad og 100.

Gani si Konsehal Carillo misugyot pa gani nga himoon nga usa ka milyon ka pesos ang iganti sa makaabot og 100 ang edad.

Apan, ang tinguha ni Carillo wala maaprobahi sa konseho. Gipasabot ni Carillo nga ang iyang tinguha mao nga ang mga tiguwang amomahon gayud sa ilang mga anak.

Kadtong mga tiguwang nga nakaabot na og 100 nga pangidaron nga nagantihan sa dakbayan mao sila si Teofila Fernandez Alino, 101, sa
Barangay Cogon Pardo; Irene Famador Leyson, 100, sa Barangay Pit-os; Nazaria Matig-a Bantila, 101, sa Barangay Busay; Maria Isip Ochia, 101, sa Barangay Sambag 1.

Ang uban mao sila si Conrado Canaya Reyes, 100 sa Barangay Basak San Nicolas; Lucila Yncierta, 101 sa Barangay Lahug; Justina Arenansa, 102, sa Barangay Mabolo ug Simeon Rama Supla, 103 sa Barangay Talamban.