‘Kasadya sa SRP Year 5’ Gi-ablihan Na

Pormal nang gi-ablihan ang pagsaulog sa ika-limang tuig sa Kasadya sa SRP kon South Road Properties niadtong Disyembre 5, 2015, adlawng Sabado didto sa SRP Sugbo Grounds.

Ang kalihokan nga inisyatiba ug proyekto ni Cebu City Mayor Michael Lopez Rama nga gipahigayon pinaagi sa public-private partnership kon PPP nagahatag ug oportunidad ngadto sa mga manindahay nga mapa-usbawan ang ilang kita ug ngadto usab sa tanan nga nangita ug kalingawan hilabi na sa pagsaulog sa Pasko.

Gumikan kay tua pa sa Paris, France si Mayor Rama alang sa pagtambong sa International nga kalihokan sa Climate Change, si Bise Mayor Edgardo Labella nga maoy Acting Mayor uban sa mga opisyales sa Association of Barangay Council kon ABC nga maoy nagdumala sa Kasadya sa SRP ang nangunay sa pag-abli niini.

Mihatag usab ug dugang nga kolor sa selebrasyon ang usa ka Santos nga Misa isip pagsugod sa kalihokan ug lakip na ang engranding fireworks display.

Sa pakighinabi sa BARUGG News, gibutyag ni Barangay Inayawan Kapitan Lutherlee “Lot-Lot” Ignacio-Soon kinsa maoy nagulo sa kalihokan nga abli ang Kasadya sa SRP sugod sa alas 4:30 sa hapon ug hangtod sa ala-1 sa kaadlawon ug molungtad na hangtod sa February 28, 2016 subay sa pagsaulog sa Charter Anniversary ning dakbayan.

Gipadayag usab sa Kapitan nga adunay 1st Barangay Extravaganza ug Agri Trade Fair karong Disyembre 12-22 nga salmotan sa 80 ka mga Barangays ning syudad.

Libre usab ang entrance sa kalihokan ug adunay usay libreng bus rides gikan sa Mambaling, Talisay ug Senior Citizen’s Park nga mohatod ug kuha paingon ug pabalik sa venue alang sa mga sa buot mosaksi niini matag gabii.

Alang usab sa kasayoran sa tanan ang mga manindahay sa SRP mao lamay gitagaan ug permit sa kagamhanan ning dakbayan nga makapaninda ug mga pabuto sugod Disyembre 15-31 ning tiuga.

Dugang pa, gawas sa mga tindang pagkaon ug pabuto, aduna poy mga baligya sa Market Market, ug mga nagkadaiyang kalingawan matag gabii nga swak sa mga pamilya ug kabarkada, ug uban pa. (Cebu City Public Information Office PIO/Greggy Jiggs P. Senados, PIO Staff)