Kapitan sa Brgy. Lorega Mihimakak nga Mitapon na sa Team Rama

Gitataw ni Lorega-San Miguel Barangay Captain Fritz Herrera nga dili tinuod ang report nga anam-anam na siya’ng mitapon sa Team Rama.

Ang pamahayag ni Kapitan Herrera iyang giluwatan tungod sa pamahayag ni kanhi konsehal Jose Daluz III nga apil siya sa mga konsehal nga nagpakita na’g indikasyon nga makig-alyado na sa Team Rama.

Si Kapitan Herrera aktibo nga alyado sa Bando Osmeña Pundok Kauswagan (BOPK) ug gani ang tanang kandidato ubos sa iyang linya pulos midaog sa eleksyon sa barangay.

Atol sa administrasyon ni kanhi mayor Tomas R. Osmeña, si Herrera gihatagan og titulo isip “deputy mayor” aron makatabang pag-asikaso sa mga gimbuhaton sa barangay nga nanginahanglan og aksyon sa City Hall.

Giklaro ni Herrera nga wala siya’y plano nga mobalhin sa Team Rama ug ang iyang pakigsuod sa administrasyon ni Mayor Michael Rama gitumong aron lang nga mahatagan og daghang proyekto ang iyang barangay nga kapahimuslan sa katawhan.

Iyang gihandom nga diha’ng nahitabo ang dako’ng sunog sa Barangay Lorega-San Miguel nagkinahanglan kadto og koordinasyon sa mga opisyal sa City Hall ug sa barangay.

Si Daluz namahayag nga mas bentaha karon ang Team Rama kay daghan na kaayo ang mga kapitan sa barangay nga misuporta sa ilang politikanhong pundok.