Kahugpungan Motabang Pagtukod sa Bag-ong CCMC

DUHA ka kahugpongan ang mipadayag og kaandam nga motabang sa dakbayan sa Sugbo aron matukod pagdali ang bag-ong Cebu City Medical Center (CCMC).

Si Mayor Michael Rama malipayong mipahibalo niining mao nga kalamboan atol sa iyang press conference didto sa City Hall.

Matud ni Mayor Rama, ang Philippine Pediatric Society, Inc. pinaagi sa Central Visayas Chapter president Jacqueline Espina misaad nga motabang paggasto sa pagmugna og pediatric ward sa pagatukorong bag-ong ospital.

Ang kahugpongan sa mga doktor nga nag-atiman sa mga bata nahingawa kaayo sa kahimtang sa kabataan nga ma-admit sa temporaryo nga ospital nga anaa lang magpahimutang sa fire department building.

Matud usab sa mayor ang “Operation Smile” mao ang grupo nga gisalmotan ni Mariquita Salimbangon-Yeung nga igsoon ni Kongresista Benhur Salimbangon.

Si Rama ug Yeung nagkakita kaniadtong Pebrero 2 dihang ang mayor maoy mikasal sa duha niya ka kawani nga ang kalihukan didto gihimo sa balay ni Yeung sa Barangay Lahug.

Wala pa mahibaw-i kun pila ang kantidad nga magasto sa Operation Smile pagtabang nga matukod ang bali’g usa ka andana sa bag-ong CCMC. Matud ni Rama nga pakigtagboan niya ang Local Finance Committee aron nga sutaon kun pila ang kantidad nga ikasukip nila sa Supplemental Budget alang sa pagpatukod og bag-ong ospital.

Ang karaang CCMC building nga nahimutang sa eskena Panganiban ug Natalio Bacalso Avenue wala na ipagamit ni Mayor Rama kay nakasinati kini og dakung kadaut tungod sa pag-igo sa linog kaniadtong Oktubre 15.

Ang mga doktor sa CCMC anaa karon migamit sa fire department building atbang ra sa ospital apan ang serbisyo lahi g’yud kun adunay kaugalingong hospital building.

Nangandoy si Mayor Rama nga ang pagatukorong hospital building makadawat og labing minus usa ka libo ka pasyente mao nga padayon ang pagdawat niya’g tabang sa ubang local government units ug sa ordinaryo nga mga tawo.