Hinay Hinayun Pagtaktak

Gibutyag ni Mayor Michael Rama nga pangtangtangon niya sa ilang trabaho ang kapin sa duha ka libo ka kaswal nga kawani diha sa Cebu City Hall apan mahimong himoon niya kini sa anam-anam nga paagi.

Matud sa mayor nga hangtud kagahapon bisi kaayo ang iyang mga gisaligan sa mao nga gimbuhaton aron pagsuta kon kinsa sa 3,298 ka kaswal sa City Hall ang dili na renyohan sa ilang employment contract.

Tungod sa pamahayag sa mayor daghan gayud sa mga kaswal nga kawani sa City Hall ang gipangkulbaan kay wala sila masayud kon makapadayon pa sa ilang trabaho.

Wala masayod si Rama kon unsa’y estelo sa mga department heads kon pahibaw-on ba nila ang ilang mga kaswal nga kawani nga giasikaso na ang ilang pagtudlo pagbalik sa katungdanan.

Gibutyag na usab ni Mayor Rama kagahapon nga ang tawo nga iyang tugyanan nga modumala isip department head sa Human Resource Development Office (HRDO) miapil na sa pagtoon kon hain sa mga kaswal ang ipabilin.

Kasaligang tinubdan nagkanayon nga ang giplanohan nga itudlo ni Rama nga bag-ong department head sa HRDO loyal g’yud kaayo kaniya.

Pagka karon ang HRDO gidumala ni Atty. Evangeline Abatayo nga duha ang katungdanan kay siya man ang permanent nga Civil
Registrar sa dakbayan.