Opinions
Ganghaan Sa Gugma
Ang ganghaan mao ang agianan aron makasulod ug makapasulod kita sa sudlanan. mohatag kini ug kahigayonan aron matugkad, mabati, magamit ug maaninaw ang butang nga atong masudlan.
Nagkadaiya nga hulagway ug gidak-on sa ganghaan ang mosantop sa atong hunahuna matag karon ug unya sa atong pagbaktas ning lapad nga wanang sa atong katilingban.
Adunay ganghaan, kon atong buksan maghubit ug dili mahubit sa pulong nga kalalim ug kahinam. ang imong mata mosulirap, imong tingog hunghung, magpangapkap ug pulong apan walay malitok, ang tanan inamang,
Si inday moingon, “Dong, unsa man ning atong nasudlan? pagkadili masabot.” si Dodong, “Day, nakasulod na kita sa ganghaan, ayaw lamang ikahibulong ang tanan. karong taudtaud, ang atong pulong mahimong hunghung, wala kay malitok apan magtagamkam ka sa dili mahubit nga pagbating mag-agos gikan sa kainit sa atong mga kasingkasing.”
Tuod man, si inday ug dodong nahimong amang nahimong ulipon sa kahilom samtang ang palibot nga nag-igot igot ug nagkutokuto dala sa pagtugkad sa lawom nga tanghaga human makasulod sa Ganghaan Sa Gugma.
