Firearm License Adto na sa Manila Himoon?

(Note: Rene Borromeo’s personal views also appeared in The Freeman News on March 7, 2014)

Ang pag-angkon og armas sama sa pistola, revolver, ug uban pa nga gitugot ubos sa balaod alang sa mga sibilyan, dili katungod sa usa ka tawo nga gilatid sa atong batakang balaod.

Usa lang kini ka “privilege” nga gihatag sa kagamhanan aron kadtong mga tarong nga tawo adunay magamit pagpanalipod sa ilang kaugalingon kay ang kapolisan dili man makabantay kanato sa tanang higayon.

Mata’g duha ka tuig ang usa ka license firearm holder mogasto og kapin sa P2,000 aron pagpabag-o sa lisensya sa armas. Mas daku nga bayad kun ang firearm holder mokuha og special permit pagdala sa armas gawas sa iyang balay.

Ang mga naghupot og lisensyado nga armas wala gayud makagusto sa gipakanaog nga hukom diin gidid-an na ang mga regional offices sa PNP Civil Security Group sa pag-processo sa mga lisensya sa armas.

Sa maong hukom, adto na g’yud kuno ang “processing” sa Firearms and Explosives Office (FEO) sa Camp Crame. Kinsa ba’y nagsugyot niini? Wala kaha gibaliw? Wala ba nila huna-hunaa ang kagastos niini?

Ikaw kuno’y anaa sa dapit sa mga lisensyado nga naghupot og armas nga mogasto pa og plete sa barko o eroplano pag-adto sa Manila?

Gawas niini, mogasto pa sila sa ilang pag-estar kay dili man dayon mahuman ang transaksyon sa maong adlaw, ilabi na ug dili ka mohatag og sa gitawag nila og “padangog.”

Kay daghan man sa mga license firearm holders nga nagtrabaho, nagpasabot kini nga mabiyaan nila ang ilang trabaho sulod sa pipila ka adlaw. Bi, kadtong mihimo niini nga sugyot, ikaw kuno ang anaa sa lugar sa mga license gun holders.

Ang awhag nako sa kadagkoan sa kapolisan nga undangon unta kining mao nga paagi. Bisan gani kamo nga mga polis, sigurado ko nga hasol alang kaninyo kining mao nga sistema.

Kun daghan man nga mga armas ang wala ma-renew sa dihang ang pagpa-renew dinhi ra himoa sa mga regional offices, mas mosamot na unya kun adto na sa Manila himoa.

Ingna ko bakakon kun dili ba ingon niini ang mahitabo.

Unya, unsa man ‘say inyong tubag? Moingon lang ‘sab dayon mo nga kadtong dili makatuman sa lagda pangdakpon?

Kun duna may inyong nabantayan nga palpak sa sistema, usba ang paagi nga dili makahasol pag-ayo sa mga tawo nga tarong ug nagtuman sa balaod.

Nabangkarota na ba ang inyong alimpatakan sa pagpangita og mga maayong paagi?

Nakasabot ko nga dunay daghang gun holders nga mi-expire na ang lisensya nga dili na matultolan dayon sa ilang address.

Abi ninyo og ngano? Ang uban mga tawo, nag-abang lang kaniadto ug mibalhin sa laing dapit nga wala magpahibalo sa kapolisan.

Kini maoy inyong aksyonan. Kun dili matultolan, kanselahon ang lisensya!

Image Credit: newsinfo.inquirer.net