FDA Warning Batok ‘Sehat Badan’

Giawhag sa Food and Drug Administration (FDA) ang tanang konsumedor nga undangon na ang paggamit sa dili rehistradong ‘Sehat Badan’, usa ka food supplement nga gibaligya pinaagi sa internet ug mapalit usab gikan sa mga street vendors sa nagkalin-laing dapit sa nasud.

Si Elvira Bongosa sa Philippine Information Agency (PIA)7 nagkanayon nga gi-alerto ang FDA bahin sa maong produkto nga napatik sa FDA Facebook.

Miingon si Bongosa nga ang maong taho maoy nakapa-aghat sa Field Regulatory Officers sa maong ahensya sa pagpahigayon og product monitoring ug pagkuha og samples.

Matud pa niya nga segun sa paisunang pagsusi niini, nakita nga ang maong produkto walay English translation, usa ka paglapas sa A.O. 88-B s. 1984 o “The Rules and Regulations Governing the Labeling of Prepackaged Food Products Distributed in the Philippines” which provides that “in case of imported food products wherein the label information are declared in foreign language, the label must also carry the corresponding English translation, otherwise such products shall not be permitted for local distribution,” sumala pa sa FDA.

Midugang si Bongosa nga ang mga produktong gibaligya isip food supplement nga walay English translation, naghulga og kadaut sa mga konsumedor kay wala silay impormasyon sa tinuod nga epekto sa maong produkto nga ilang gipalit.

Si Bongosa miingon nga kining maong produkto tataw nga wala mopasar sa FDA standard of safety and quality mao nga naghatag og hulga sa maayong panglawas sa katawhan.

Nagkanayon si Bongosa nga basi online advertisement, giingong ang Sehat Badan usa ka herbal drink nga makapa-uswag sa kinatibuk-ang panglawas ug makaayo sa nagkalain-laing sakit sama sa hubak o asthma, urinary stones, allergy, impotence, rheumatism, toothache ug ulcer.

Ang maong mga therapeutic o health claims dili aprobado sa FDA tungod kay ang maong produkto dili man rehistrado sa maong buhatan.

Gibutyag ni Bongosa nga ang FDA ang tig-kontrolar sa tanang produktong adunay therapeutic o health claims mao nga kinahanglan una sa maong herbal drink nga mokuha og License to Operate (LTO) isip manufacturer o distributor gikan sa FDA.

Matud ni Bongosa nga gitataw sa FDA nga kadtong mga health products nga nakaabot sa FDA standards lamang ang isyuhan nila og Certificate of Product Registration.