Dungog

kini ang imahen, hulagway ug talan-awon’g
magdibuho sa tawo’ng maukiton
sa buhat nga katilingbanon…

dili sayon ang dungog nga mahimo’ng sumbanan,
dungog nga mahimong panag-ingnan
karon ug sa kahangtoran…

adunay dungog sa pagkasalawayon, badlongon,
ang suhi, sukwahi maoy buhaton
siya panghimaraoton…

mas makita ug magpasuwabe nga gipanday’ng dungog
kaysa sa tingog nga kanila atong madungog
dili kini ikapasibantog…

hinayhinay ug kanunay ang dungog mokataykatay,
himoong saysay, hubiton sa mga tag-as ug kilay
dungog, daw tsismis, ikalipay…

pulong pagdayeg nga magikan sa lainlaing binuhatan
saw-an, daygon sa nakapahimulos sa kaayuhan
himoon kining panag-ingnan….

sa pagpangligid sa panahon, ang dungog dali hisgotan
kon ang naghupot sa maayong binuhatan
tipik na lamang sa handumanan….