DOH Nangita sa 2 ka Pasaherong Cebuano

Ang Department of Health mipahibawo nga duha lamang ka mga Cebuano nga pasahero sa abyon nga gikan sa United Arab Emirates nga gisakyan usab sa Overseas Filipino Worker (OFW) nga gikatahong napositibo sa Middle East Respiratory Syndrome Corona Virus (MERS-CoV).

Si DOH-7 Regional Director Jimmy Bernadas nagkanayon nga nagpakitabang na karon ang iyang buhatan sa Philippine National Police (PNP) sa pagpangita sa duha pa ka mga pasahero gikan sa UAE aron mapaubos kini sa mga medical examination.

Kini aron pagsuta kun wala ba usab kini magdala sa naasoy nga virus nga posibling makatakud usab sa laing mga tawo sa gipuy-an niini.

Si Bernadas nagdumili pa paghingalan sa naasoy nga mga pasahero nga gituohang OFW usab apan ang ilang gibasehan karon mao ang manipisto nga nakuha nila gikan sa airport.

Gipahibawo usab niya nga may 15 na ka mga pasahero ang gipaubos sa medical examination sa Vicente Sotto Memorial Medical Center (VSMMC) nga nakauban usab sa OFW nga napositibo sa virus nga MERS-COV.

Sa nahisgutang 15 ka nga pasahero, 12 niini ang taga Cebu, 2 ang taga Bohol ug usa ang taga Negros.

Dugang pa ni Bernadas nga mopagawas unya og medical result ang ilang buhatan gikan sa subsub nga medical check-up sa naasoy nga mga pasahero didto sa VSMMC.

Image Credit: www.philstar.com