DOH Mipaila sa Simtomas sa MERS-CoV

Gibutyag sa mga tinugyanan sa panglawas ang pipila ka simtomas sa sakit nga Middle East Respiratory Syndrome Corona Virus (MERS-CoV).

Matud pa sa Department of Health (DOH), ang MERS-CoV usa ka klase sa corona virus nga dala usab sa Severe Acute Respiratory Syndrome (SARS).

Pipila sa mga simtomas niining maong sakit mao ang hilanat, ubo, lisud sa pagginhawa ug pagkalibang sulod sa duha ka semana.

Gitambagan ang mga nakasinati niining mga simtomas nga magpahiling gayud sa tambalanan aron malikayan ang pag-grabi niini.

Gipasabot ni DOH Assistant Sec. Eric Tayag nga kuhaan og sample sa tutonlan ang usa ka gidudahan nga biktima una pa kini tambagan kun kinahanglang ipasulod sa ospital o i-quarantine.

Giingong peligro kaayo ang MERS-CoV kay paspas mamakod ug mahimong ikamatay sa usa ka pasyente sulod sa 10 ka adlaw.

Bisan wala pay kasigurohan kun unsa ang hinungdan niini, gidudahang sa mga camel nagsugod ang maong sakit.

Sugod sa buwan sa Marso 2013 hangtud Abril 13, 2014, may natala na nga 228 ka kaso sa MERS-CoV sa tibuok kalibotan diin 92 niini ang namatay apil na ang usa ka Pinoy health worker sa usa ka tambalanan sa United Arab Emirates.

Aron malikayan ang MERS-CoV, gitambagan sa DOH ang publiko nga kanunay manghugas sa kamot, sap-ungan ang baba kun mo-ubo ug likayan ang mga lugar nga gidugokan sa katawhan.

Samtang padayong gi-monitor karon sa Bureau of Quarantine sa Pilipinas ang tanang pasaherong mo-abot gikan sa Middle East nga adunay hilanat.