DFA Motabang sa mga OFW Gikan sa Libya

● Augmentation team mopadali pagproseso sa mga overseas Filipino worker (OFW) nga mobiya sa Libya tungod sa gubot politika didto.

Magpadala og dugang kawani ang Department of Foreign Affairs (DFA) sa Libya karong semanaha, matud pa ni DFA Spokesperson Charles Jose.

Si Jose miingong katungdanan sa augmentation team nga mapadali ang pagproseso sa mga overseas Filipino worker (OFW) nga gusto nang mobiya sa Libya tungod sa kagubot sa politika didto.

Sa pagkakaron, giingong adunay 51 ka OFWs na sa embahada sa Pilipinas sa Tripoli nga naghikay sa ilang dokumento aron makauli, apan gamay pa lamang kini nga parte sa gibanabanang 13,000 ka Pinoy sa Libya.

Samtang, nagtukod na og Crisis Quick Response Team ang Department of Labor and Employment (DOLE) nga maoy motutok sa kahimtang ug panginahanglan sa mga OFW nga apektado sa kagubot sa Libya.

Kahinumdoman nga human sa pagdeklarar og crisis alert level 3 sa DFA sa Libya, mipatuman na usab og deployment ban ang Philippine Overseas Employment Administration (POEA) alang sa mga Pinoy nga paingon didto.