DBM Migahi’g P11-B Para sa Puloy-anan

Mokabat sa P11 bilyones ang gigahin sa kagamhanan niining tuiga alang sa pagpatukod og kabalayan sa mga pamilyang walay pinuy-anan.

Sumala ni Kalihim Florencio Abad sa Department of Budget and Management (DBM), nga gipalista na sa nasudnong kagamhanan ang tanang mga tawo nga magkatulganan sa mga aseras sa tibuok nasud, aron kahatagan og temporaryong kapuy-an.

Matud pa ni Abad nga napanglangtawan sa kagamhanan ang kapeligro sa kinabuhi niining mga tawhana ilabi na karong nangausab na ang dagan sa klima sa panahon.

Busa gikinahanglang ihiklin daan sila sa luwas nga mga lugar aron kalikayan ang pagkadaot unya sa ilang kinabuhi, matud pa ni sa Abad.

Midugang siya nga niining maong suliran, and National Housing Authority (NHA) ug and Social Housing Finance Corporation (SHFC) nag-andam na og gahin nga mokabat sa P7.3 bilyones aron pagpatukod og balay sa mokabat sa 15,862 ka mga pamilya nga naapektohan sa mga proyektong inprastraktura o kaha nanimutang sa mga peligrong sona o dapit.

Matud pa ni Abad nga ang NHA migahin usab og P577 ka milyon ka pesos aron pagpabalhin sa 7,215 ka mga gitawag nga informal settler families (ISFs) nga nagpuyo sa mga peligrong lugar ngadto sa luwas nga mga dapit.

Miingon si Abad nga sa milabay nga mga katalagman, ang NHA naggahin og P736 milyones alang sa gikinahanglang emergency housing assistance lakip na niini ang mga materyales sa balay ngadto sa mikabat og 26,426 ka mga biktima sa kalamidad.

Sa laing bahin, ang SHFC mitabang usab sa 16,500 ka pamilya nga nagkinahanglan og puloy-anan ubaN sa gahin nga mokabat sa usa ka bilyon ka pesos gikan National Home Mortgage Finance Corporation (NHMFC).

Nagkanayon usab si Abad nga ang Department of the Interior and Local Government (DILG) may bahin usab niini sama sa gigahin nila nga P1.2 bilyones alang sa temporaryong kapuy-an sa mga informal settler.

Sa katibuk-an, si Abad miingon nga sa 2015 National Budget gigahinan usab niini og P100 milyones alang sa mga puloy-anan sa 341 ka pamilya sa uniformed personnel, sama sa Armed Forces of the Philippines (AFP), Philippine National Police (PNP), Bureau of Jail Management and Penology (BJMP), ug ang Bureau of Corrections (BuCor).