‘Construction Materials’ Gipanghatag Na

Ang kagamhanan sa dakbayan sa Sugbo nagsugod na pagpanghatag og construction materials sa mga nasunogan nga pamilya sa Barangay Lorega-San Miguel.

Si Dr. Ester Concha, hepe sa Department of Social Welfare and Services (DSWS), nangulo sa pagpang-apud-apod sa construction materials ngadto sa una nga batch sa mga pamilya.

Matud ni Concha nga 92 ka pamilya ang una nga nahatagan og ‘tag 10 ka pligo nga sin ug 10 ‘sab ka pligo’ng plywood aron magamit nila pagpatukod pagbalik og balay.

Si Concha miingon nga 92 lang ka pamilya ang ilang nahatagan sa una nga batch kay ang ilang lugar nga katarokan pagbalik naklaro na.

Ang pag-reblock sa dapit nga nasunogan ug pagbutang og lapad nga karsada nagkahulogan nga mogamay ang luna nga katarukan og panimalay.

Si Mayor Michael Rama mipasabot nga kadtong mga pamilya nga kaniadto nagpahimulos sa lapad kaayo nga luna dili na makaangkon og susama nga gidak-on human sa reblocking.

Gusto ni Mayor Rama nga ang reblocking hingpit na gayud nga mahuman karong April 18 motangkud na nga usa ka buwan gikan sa pagkasunog sa kabalayan sa unom ka sitio sa Lorega.

Tulo ka heavy equipment sa City Hall sama sa bulldozers mipatag sa dapit nga nasunogan aron sa pagpadali sa reblocking samtang ang mga kawani sa Department of Engineering and Public Works (DEPW) ug Management Information and Computer Services (MICS) maoy nagtinabangay sa technical aspect sa reblocking.

Kapin sa 500 ka balay ang naugdaw sa sunog og kapin sa 1,000 ka pamilya ang nawad-an og kapuy-an sa mao nga sunog.

Sa laing bahin, ang kagamhanan sa dakbayan sa Mandaue miapud-apod na usab og mga pagkaon ngadto sa 92 ka pamilya nga nasunogan usab sa ilang kabalayan didto sa Barangay Tingub, Mandaue niadtong Martes sa gabii.

Image Credit: www.equipmentworld.com