“City Hall At Your Doorstep” Ipahigayon Sa Kinasang-an Ug Labangon

Lain na usab nga semana, lain na usab nga mga barangays ang matabangan sa libreng serbisyo sa kagamhanan ning dakbayan nga gipangulohan ni Mayor Michael Lopez Rama.

Kini pinaagi sa programa sa mayor nga gitawag ug ‘City Hall at Your Doorstep’ kon ‘Piyesta sa Pagpangalagad’ karong Pebrero 11 Huwebes ngadto sa Acacia Gymnasium sa Barangay Kinasang-an ug karong Pebrero 12 Biyernes ngadto sa Compound sa Department of Social Welfare and Services kon DSWS sa Barangay Labangon.

Ang programa inisyatiba ni Mayor Rama nga iyang gisugdan sukad niadtong tuig 2010 sa iyang unang termino isip amahan ning dakbayan diin ang mga batakang serbisyo sa 22 ka mga departamento sa Cebu City Hall dalhon ngadto sa tugkaran sa mga Sugbuanon alang sa paghatag ug libreng mga serbisyo nga alang sa tanan. Dili man kini literal nga tugkaran sa ilang mga panimalay apan ngadto gayod sa ilang tagsa-tagsa ka mga barangay.

Ang maong programa nagahatag ug libreng batakang panerbisyo sa katawhan sama sa konsultasyon sa rehistro sa pagkatawo, pagpakasal, ug pagkamatay; mass feeding ug timbang sa mga kabataan; medikal nga konsultasyon; pagpang-limpyo sa mga kanal ug drainage; pagpanaod ug pagpang-ayo sa mga street lights; pagrehistro, kapon ug bakuna sa mga iro ug iring; pagtanyag ug laboratory services sama sa blood typing ug blood sugar testing; pagpanghatag ug mga seedlings nga itanumay nga mga herbal, prutas ug utanon; pag-isyu ug Cedula; paghatag ug nagkadaiyang mga tambal ug bitamina; ug libreng seminar sa epekto sa pagamit ug ginadiling druga, traffic rules, pagikay sa sunog, environmental awareness, mga kalihokan ug kalambuan sa dakbayan, ug uban pa.

Ang kalihokan sugdan ug usa ka Santos nga Misa sa als-8 sa buntag ug molungtad hangtod na nga maserbisyohan ang tanan nga motambong niini. (Cebu City Public Information Office PIO/Greggy Jiggs P. Senados)