CDA Wala’y Gahum Mosilot sa Malapason’g Coop

Walay gisilotan nga opisyal sa kooperatiba o mga kooperatiba nga pundok gumikan sa paglapas niini sa balaod bahin sa kooperatiba.

Mao kini gibutyag niadtong Myerkules ni manlalaban Fritzie Lacanaria, legal officer sa Cooperative Development Authority (CDA)7.

Matud pa ni Lacanaria nga walay labot sa mandato sa CDA ang paghuwes o pagpakanaog og silot sa mga makalapas sa balaod sa matag pundok sa kooperatiba.

Miingon si Lacanaria nga kutob lamang sa superbisyon ang katungdanan sa CDA nga mabantayan ang matag pundok sa kooperatiba nga mosubay sa balaod nga makaayo sa iyang mga membro.

Ang CDA usa ka ahensya sa kagamhanan nga mopamatuod sa legal nga pagpadagan sa usa kooperatiba pinaagi sa pagpahigayon og permiso o lisensya niini. Kun may mga kooperatiba nga nabangkaruta, kini tungod kay dili maayong pagkadumala sa mga opisyal niini.

Kun may nasilotan man nga mga opisyal sa kooperatiba, kini tungod kay nahukman sila sa korte sa kasalanan nga ilang nahimo.

Matud pa ni Lacanaria nga igo lamang sila pagbadlong kun may masayran sila nga paglapas sa usa ka kooperatiba.

Bahin naman sa kooperatiba nga walay lisensya, ang CDA motabang pagpasidaan sa mga tawo nga dili angay pasakopan ang ingon niini nga mga koperatiba aron dili madisgrasya ang ilang kuwarta.