Cash Assistance sa mga Seniors, Ihatag Karung Adlawa

Ipanghatag na karung adlawa ang kuwang nga ‘tag P2 mil ngadto sa matag senior citizens dinhi sa dakbayan sa Sugbo.

Kadto’ng mga senior citizens nga wala makakobra sa ‘tag P3 mil nga cash assistance kaniadto’ng pasko mahimo’ng ‘tag P5 mil na ang ilang dawaton karon.

Si Mayor Michael Rama miingon nga nahukman niya nga ipahatag ang kapin sa P5 milyones nga cash assistance nga wala makolekta niadto’ng pasko sa mga senior citizens nga posible’ng wala na dinhi sa dakbayan magpuyo.

Matud ni City Treasurer Diwa Cuevas nga dili na g’yud unta angay nga ipanghatag pa ang ‘tag P3 mil niadto’ng wala makakobra sa miagi’ng pasko apan wala siya’y mahimo gawas sa pagtuman sa mando sa mayor.

Si Rama miingon nga kun diin gipanghatag ang mga cash assistance sa mga senior citizens kaniadto’ng pasko adto gihapon ang pagpanghatag karung adlawa.

Ang paghatag sa ‘tag P2 mil karon maoy mokompleto na nga P12 mil ang nahatag sa mga senior citizens sa tuig 2014. Karong tuiga, walay pag-usbaw sa budget nga cash assistance sa mga senior citizens.