Allowance sa mga City Scholars, Wala pa Mahatag

Hangtud karon wala pa gihapon makahatag pagbalik ang Cebu City Hall sa gisaad niini nga ‘tag usa ka libo ka pesos isip “school supply allowance” kada semester ngadto sa mata’g city scholar.

Si Mayor Michael Rama nga gitug-anan sa mao nga problema, miawhag sa mga sakop sa Scholarship Committee nga asikasohon dayon ang reklamo sa mga scholars.

Kapin na sa 10 mil ka scholars ang giatiman karon sa kagamhanan sa dakbayan sa Sugbo pinaagi sa pagbayad og ‘tag P10 mil matag usa kanila kada semester.

Ang mga city scholars nakadawat na kaniadto kausa og ‘tag P1,000 nga school supply allowance gikan sa City Hall, apan gikan niadto wala na sila makadawat pag-usab.

Ang City Council miaprobar sa kinatibuk-an nga kapin sa P400 milyones para karong tuiga nga gisugyot ni Mayor Rama diha sa Annual Budget aron gastohon sa nagtubo nga gidaghanon sa mga city scholars.

Wala kaayo makapasabot ang Scholarship Committee kun ngano nga nahunong man ang paghatag sa school supply allowance ug kun kadtong wala mahatag sa City Hall sa nangaging mga tuig makobra pa ba sa hingtungdan nga mga scholars.