Kampanya Batok Rabies Giawhag sa DVMF

Mga opisyal sa lima ka barangay dinhi sa dakbayan sa Sugbo giawhag nga kampanyahan ang mga laag nga iro sa ilang dapit tungod kay adunay mga iro nga napositibo sa rabies sa ilang barangay.

Si Dr. Alice Utlang nga maoy nagdumala sa Department of Veterinary Medicine and Fisheries (DVMF) miingon nga aduna na gani usa ka tawo nga namatay sa rabies human mapaaki og iro gikan niadtong Enero.

Matud ni Utlang nga unom ka iro sa Barangay Apas, Parian, Kinasang-an, Guadalupe, Mabolo ug Talamban ang napositibo nga adunay rabies

Ang iro nga nakapaak og tawo didto sa Barangay Mabolo maoy nakapatakud og rabies sa biktima nga wala gayud makaantos tungod kay wala usab magpa-injection of anti-rabies vaccine.

Ang rekord nagpakita nga mius-os ang mga iro nga nabakunahan karong tuiga kon itandi sa nangagi nga katuigan.

Si Utlang miingon nga 21,415 ka iro ang ilang nabakunahan sa miaging tuig apan gikan sa Enero hangtud sa Abril ning tuiga ang nabakunahan miabot pa lang og 6,329.

Gipasabot ni Utlang nga giusab na nila ang pamaagi nga wala na sila mosuroy sa mga barangay aron pag-injection sa mga iro og ang ilang gihatagan og injection kadto na lang mga iro nga iparehestro sa mga tag-iya.

Gikan niadtong Enero miabot lang og 321 ka iro nga gipangdakup ug 117 ang gitugyan sa ilang mga tag-iya. Gusto unta sila si Utlang nga ipasagop ang mga iro niadtong wala pay mga binuhi, apan karong tuiga 82 lang ang gisagop og 189 ang ilang gipatay.