Mga Residente Sa Barangay Lahug Natabangan

Liboan ka mga molopyo sa Barangay Lahug ning syudad ang natabangan sa mga libreng serbisyo sa kagamhanan ning dakbayan pinaagi sa programa ni Mayor Michael Rama nga gitawag og ‘City Hall at Your Doorstep’ kon ‘Piyesta sa Pagpangalagad’ nga gipahigayon sa Sitio Banica sa maong barangay karong adlawa Abril 7, 2016 Huwebes.

Sa pakighinabi sa BARUGG News, gitataw ni Juliet Terana, 22 kinsa nagpakonsulta sa iyang anak nga usa ka tuig ang edad ug adunay sip-on ug ubo nga, “Dako gyod among pasalamat ni Mayor Rama kay natabangan mi sa mga libreng mga serbisyo, libre pa gyod ang pacheck-up ug naa pay libreng tambal, naa pa gyod duol sa among balay dako kaayo ni ug tabang sa mga katawhan labi na sa mga pobre.”

Dugang gipadayag ni Terana nga angayn gyod suportahan ug ipadayon ang programa ni Mayor Rama kay para kini sa kaayohan sa katawhan ug aron mas daghan pang matabangan matag barangay.

Naglangkob sa mga gitanyag nga serbisyo sa 22 ka mga Departamento sa Cebu City Hall mao ang konsultasyon sa rehistro sa pagkatawo, pagpakasal, ug pagkamatay; mass feeding ug timbang sa mga kabataan; medikal nga konsultasyon; pagpang-limpyo sa mga kanal ug drainage; pagpanaod ug pagpang-ayo sa mga street lights; pagrehistro, kapon ug bakuna sa mga iro ug iring; pagtanyag ug laboratory services sama sa blood typing ug blood sugar testing; pagpanghatag ug mga seedlings nga itanumay nga mga herbal, prutas ug utanon; ug paghatag ug nagkadaiyang mga tambal ug bitamina, ug uban pa.

Samtang kahinumdoman nga ang Barangay Lahug dugay na nga nahikawan sa mga proyekto ug mejoras hilabina sa milabayng administrasyon tungod sa politikanhong kaakohan sa kanhi namunoan niini.

Sa administrasyon ni Mayor Rama ang Barangay Lahug wala gyod pasagdi sa paghatag ug mga kaayohan ug proyekto. Gani nakadawat ang barangay ug bag-ong sakyanan nga personal mismo nga gidawat ni Lahug Barangay Kapitan Jovito Taborada Jr didto sa Plaza Sugbo ug uban pang mga kaayohan.

Bisan pa ug wala suportahi sa mga opisyales sa maong barangay ang kalihokan, sa kinatibuk-an nagmalampuson gihapon kini uban sa paghangop sa mga residente sa barangay.

Dugang pa, ang kalihokan gipahigayon na matag adlawng Lunes hangtod Biyernes aron malukop ang 80 ka mga barangays nga naglangkob ning syudad kini diha sa paghatag ug serbisyo nga alang sa tanan. (Cebu City Public Information Office PIO/Greggy Jiggs Senados)