Clearing Operations sa Brgy Ermita, Nasugdan na

Mga lumulupyo nalipay nga maangay ang gidak-on sa luna nga ilang mapuy-an

Daghan sa mga nasunogan sa Sitio Bato, Barangay Ermita nangalipay nga nasugdan na gayud ang “clearing operation” nga gihimo sa kagamhanan sa dakbayan nga gitumong aron maangay ang gidak-on sa yuta nga ilang mapuy-an.

Dugay nga nasugdan ang pagpangguba salin sa sunog kay adunay mga tawo nga mibabag nga mapahigayon ang clearing operation kagahapon sa buntag samtang walay kasiguroan kon ang tanan ba nga nasunogan ang kahatagan og luna.

Kapin sa usa ka gatus ka balay ang nasunog apan gipuy-an kini sa kapin sa 200 ka pamilya.

Si Erwin Goc-ong nga maoy representante sa nasunogan miingon nga gusto nila nga adunay kasiguroan nga ang tanang biktima sa sunog kahatagan og tagsa-tagsa ka pwesto nga katukoran nila’g balay.

Matud ni City Administrator Jose Marie Poblete nga kon pila ka balay ang nasunog mao usab ang gidaghanon sa ipang-apod-apod nga mga lote apan dili pa sila makabutyag kon unsa ang gidak-on sa mata’g luna.

Si Goc-ong misugyot nga ang clearing operation adto na ipahigayon liwas sa eleksyon apan diha-diha kini nga gibalibaran sa mga opisyal sa City Hall.

Daghang mga nasunogan sa Sitio Bato misiyagit nga gusto nila nga himoon na ang clearing operation sa labing dali nga panahon kay aron makasugod na sila pagtukod pagbalik sa ilang panimalay.

Si Bee Gala Bagolor nga usa sa nasunogan og karon anaa temporaryo nga nag-estar daplin sa karsada miingon nga gusto na siya nga makatukod sila’g balik og balay kay nasakit na ang iyang anak tungod sa dili maayo nga kondisyon sa karsada.

Sanglit angayon man ang gidak-on sa lote nga iapud-apod sa nasunogan, gikauyonan nga ang tanang mga balay nga naapil sa sunog diin ang uban mga dagko og pwesto, apilon gayud sa clearing operation.

Aron paglangay sa clearing operation, adunay mga tawo nga mituyo pagguba sa dakung payloader nga gamiton pagtukmod sa mga straktura og mopatag sa nasunogan.

Giputol ang electrical connection sa ignition switch ug gibugto usab ang linya sa krudo aron dili moandar ang payloader, apan dali ra hinoon kini nga nahimoan og sulbad ang problema.

Sulod sa usa ka oras nga clearing operation, lapad nga lugar sa nasunogan ang napatag sa payloader nga nagsilbi usab nga bulldozer. Ang mga semento nga kabahin sa straktura didto gitukmod paingon sa dagat og nakapalapad kini sa yuta nga kapuy-an sa nasunogan.

Si Raquel Arce, hepe sa Prevention Restoration Order and Beautification Enhancement (Probe) nga maoy nagsilbi nga operations officer sa clearing operation, miingon nga ipadayon nila ugmang adlawa (Sabado) ang pagpatag sa maong dapit.

Mga polis gikan sa Carbon Police Station nga gipangulohan ni Chief Inspector Noel Lomente mihatag og siguridad sa mga kawani sa City Hall nga nagpahigayong og clearing operation.

Ang ubang biktima sa sunog miingon nga angay’ng apilon gayud sa clearing operation ang tanang nasunog nga balay ug building kay may nakita sila nga midali-dali sa pag-ayo sa tulo ka andana daplin sa Quezon Boulevard.