CITOM: P3.6 Milyones Kinahanglan sa Dugang Traffic Enforcers

Ang kadagkoan sa Cebu City Traffic Operations Management (CITOM) gusto nga dugangan og 70 ang ilang mga traffic enforcers aron nga mas epektibo nilang mapahapsay ang dagan sa mga sakyanan sa dakbayan.

Si Konsehal Gerardo Carillo misugyot og resolusyon nga nag-awhag sa City Budget Office nga gahinan og P3.6 milyones ang alang sa sweldo sa kuhaon nga bag-ong traffic enforcers bali’g unom ka buwan.

Pagka karon ang CITOM aduna lay kapin sa 250 ka traffic enforcers ug gihulagway nga ang mao nga gidaghanon kuwang kaayo nga kadestinohan og mga enforcers ang tanang dagko nga eskena dinhi sa dakbayan. Matag traffic enforcer sweldohan og P400.

Si Jonathan Tumulak, operations chief sa CITOM, mipasabot nga pagka karon adunay mga eskena nga gibuak nila ang duty sa mga enforcers aron mo-report lang sila sa panahon nga problema kaayo ang trapiko.

Apan matud ni Tumulak nga niini’ng milabay nga mga adlaw nabantayan nila nga dili na g’yud katalikdan ang mga eskena tungod kay nagkadaghan g’yud ang mga sakyanan.

Base sa rekord sa Land Transportation Office (LTO) aduna nay 652 mil kapin ka sakyanan nga narehestro dinhi lang sa Central Visayas, ug kadaghanan niini ania sa Sugbo.

Ang mga sakop sa Cebu City Council miawhag usa ni Konsehal Carillo nga iuktaba ang pagtuki sa mao nga isyu unya sa sunod nga sesyon.

Malaumon si Tumulak nga maaprobahan ang mao nga sugyot pagdugang og mga traffic enforcers ilabi na nga nagsingabot na ang pasko nga mosamot pagdagsang ang mga sakyanan nga moanhi sa dakbayan.